Film Industry kaihthawhin a awm leh ṭan

Sumdawnna kawnga hrileng tuar nasa ber zinga mi chu film industry hi a ni awm e. Covid-19 hrileng avangin hun eng emaw chen lemchan khawvel a reh ṭhuap a, film tlangzarh hun tur tam tak tihkhawltlai a nih piah lamah film tam tak chan ṭan hun tur sawn pawh hlat a ni.

Tunah erawh boruak a ziaawm ṭan ta bawk a, film nghahhlehawm tak tak chu an chang ṭan leh ta sup sup a, chung zingah chuan movie lam tuipuitute nghahhleh ‘Aquaman 2,’ leh ‘John Wick 4’-te pawh a tel.

Inrinni liam ta zan khan Vin Diesel chuan,"Cinema a lo kir leh ta! He thu hi sawi a nuam hle mai," tiin Variety-in a kawmnaah a sawi a, hetianga a sawi pawh hi a awm khawp mai. F9 a che hit miau a!

Kum 2018-a tlangzarh DC film hit Aquaman chhunzawmna 'Aquaman and The Lost Kingdom' chu tunah hian an chang ṭan tawh a, nakkum December 16-a tlangzarh hman an tum. Thla 18 vel hun a la awm a, James Wan-a IG post aṭanga a lan dan chuan vur puk velah tunah hian an chang mek niawm tak a ni.

Lionsgate pawhin 'John Wick: Chapter 4' chan ṭan hun tur chu an sawn hlat hnuah tunah chuan production an ṭan thei ta a, an Twitter account lamah hemi chungchang hi an tarlang.

John Wick 4-ah hian Keanu Reeves kiangah Laurence Fishburne, Rina Sawayama, Shamier Anderson, Skarsgård leh Donnie Yen-te kan hmu dawn a, a hmuhnawm viau ang.

Film star lar rual an fuankhawmna film tur, Daniel Craig channa 'Knives Out 2' pawh a rik rek rek hnuah tunah chuan an sawi lawk ang ngeiin Greece-a tuipui kam velah an chang ṭan tawh.

Director Rian Johnson chuan Thawhṭanni khan Twitter lamah film an chang ṭan ta tih a sawi. He film-ah hian Daniel Craig chu Benoit Blanc lemah a chang leh dawn a, Dave Bautista, Edward Norton, Janelle Monáe, Kathryn Hahn, Leslie Odom Jr., Kate Hudson, Madelyn Cline leh Jessica Henwick-te nen an chang ho dawn a ni.

Heng bakah hian film lian tak tak production kalpui mek a awm bawk a, nakkum lam aṭang chuan film industry pawhin ngai a awh leh tawh a rinawm.