Britney Spears Lainattu aw rawl a ring, MAHSE!

A conservatorship chung­changa hun eng emaw chen tal buai tawh Britney Spears chuan court-ah a duhnate court hnenah thlen tawh mah se, tunah rih chuan, a ngennate hnawlsak niin, a pa kutah a conservatorship zawng zawng a la awm chhunzawm dawn.

Nilainia Los Angeles Superior Court-in document a file thar aṭanga a lan dan chuan Britney Spears attorney Samuel Ingham III-in Britney conservatorship atana a pa Jamie Spears dah tawh lo tura ngenna thla khat vel liam taa a thehluh chu a hnawl sak a ni.

Mahse, tuna document chhuak hi kar hmasa lama hearing chungchanga thutlukna erawh a la ni lo.

Kar hmasa khan Britney hian minute 24 chhung telephone kaltlangin court-ah a duhzawngte a sawi a, chu a thusawi chuan mi rilru a hnehin khawngaihtu pawh a ngah hle. Christina Aguilera, Justin Timberlake leh a nau Jamie Lynn Spears-te pawh a thlavang hauhin an ṭawng chhuak hial.

Kum 2008 chhoa Britney a chet buai chhoh tak tak vel aṭang khan Jamie Spears hi a fanu co-conservator a ni ṭan a, kum 2019-ah phei kha chuan conservatorship zawng zawng a kutah court-in a dah ta a ni.