2022-ah ‘Old Guard’ chhunzawmna chang ṭan dawn

Charlize Theron chuan nikum lama Netflix-in an tihchhuah 'The Old Guard' chhunzawmna chu nakkum kumtirah an chang ṭan dawn tih a sawi.

Variety zawhna chhangin Theron chuan script pawh an peihfel tawh tih leh nakkum first quarter-ah camera pawh an tihnun ṭan dawn thu a sawi a ni.

Marwan Kenzari leh Luca Marinelli te kha kan hmu leh dawn tih Theron chuan a sawi chiang nghal a, tlangzarh hun tur tak erawh a la sawi lang lo.

'The Old Guard' kha $maktaduai 70 lai senga an siam a ni a, Netflix movie en hlawh ber pawl niin tlangzarh aṭanga kar li chhungin chhungkaw maktaduai 78 velin an en hman anga chhut a ni a, Netflix film en hlawh parukna a ni pha hial.

Hetihlai hian Charlize Theron hi Fast & Furious spin-off film dangah a chang leh dawn niin a lang. Vin Diesel chuan Variety hnenah hemi chungchang hi hrilhin tunah hian Cipher (Theron) chungchang lan tamna tur Fast & Furious spin-off script buaipui mek a nih thu a sawi a ni.