IG khelmuala 'top scorer' CR7
Euro 2020-a top scorer ni mai thei dinhmuna ding mek Portugal captain Cristiano Ronaldo chu Instagram rich list-ah topper a ni a, sponsor post a siam dawnin a ni aia chhiar to thei an awm lo.
Juventus forward hian a account aṭanga advertisment a post-in post pakhatah $maktaduai 1.6 vel a laut thei niin social media marketing firm Hopper HQ chuan an tarlang. Ronaldo hian Dwayne "The Rock" Johnson dinhmun ṭhin chu he list-ah hian a nek chhuak a ni.
Instagram rich list-ah hian CR7 hi a vawi khatna atan topper a ni a, hetiang list hi kum 2017 aṭang khan an siam ṭan a ni. Dwayne Johnson hi sum lalut tam thei ber dawttu a la ni tho a, post pakhatah $mtd 1.52 vel a inchhiar thei nia chhut niin pathumna chu zaithiam Ariana Grande a ni a, post pakhatah $mtd 1.51 vel a lalut thei niin an chhut.
He list-ah hian CR7 ni lo infiammi dang lang an awm a, chu chu khelmual lama a inelpui ber Lionel Messi niin a ni hi pasarihnaah a awm thung a, post pakhata $mtd 1.1 vel lalut thei dinhmunah a ding. Infiammi zingah chuan Paris St-Germain leh Brazil forward Neymar a awm leh a, 16-naah a awm.
Social media tualzawla lar CR7
Khelmuala record tam tak siam tawhtu Cristiano Ronaldo hi tunah hian Facebook page a mihring mal account-ah chuan follower ngah ber ani mek bawk a, follower maktaduai 149 a nei. FB page follower ngah ber chu Facebook App a ni a, pahnihna chu Samsung niin Ronaldo hi pathumna a ni. Twitter lamah erawh account follow-tu ngah lamah pangana a ni thung.
Instagram-ah erawh khawvela follower ngah ber a ni a, hmanni khan follower mtd 300 nei tling thei hmasa ber record a siam a, tunah phei chuan mtd 308 lai follow-tu a nei tawh.
Kardashian an langsar
Kardashian unau pathum ngawt IG rist list top 10-ah hian an lang. Khawvela billionaire naupang ber record pawh lo siam tawh Kylie Jenner chu palinaah a awm a, ani hian post pakhat a siamin $mtd 1.49 vel a la thei niin Hopper HQ chuan an chhut.
Kim Kardashian chu parukna ani thung a, Kendal Jenner chu 10-na a ni bawk.
Anni bakah hian Selena Gomez, Beyonce Knowles leh Justin Bieber-te pawh a sang pawl an ni.
