BTS 'Butter' CD single Ed Sheeran hming pawh a lang

Bangtan Boys chuan Ningani khan karleh Zirtawpnia an tlangzarh tur 'Butter' CD single track listing an tichhuak a, chutah chuan British singer Ed Sheeran hming pawh a lang.

Ed Sheeran hian kar tir lamah khan BTS a thawhpui dawn tih a sawi lang tawh a, chu an thawhhona hla chu Ninganiah khan rawn tichiangin, BTS 'Butter' CD single-a 'Permission to Dance' hlaah an thawk ho a ni.

'Permission to Dance' hi Sheeran leh a ṭhian Snow Patrol singer Johnny McDaid-te phuah a ni a, British producer Steve Mac leh 'Butter' co-writer Jenna Andrews-te pawhin he hlaah hian tha an thawh ve bawk.

BTS 'Butter' CD single-ah hian track pali a awm dawn a, 'Butter' leh 'Permission to Dance' bakah hian heng hla pahnihte hi instrumental-in an dah tel.

'Butter' hi May 21-a an tlangzarh kha niin tunlaia hla lar ber zinga mi a ni a, US single chart-ah phei chuan kar eng emaw zat pakhatna a ni tawh. YouTube leh streaming platform hrang hranga khawvel ram hrang hrang aṭangin an stream nasa hle a ni.