‘Chris Tomlin & Friends: Summer EP’ A ngaihthlak theih ta

Christ Tomlin chuan a EP thar ber ‘Chris Tomlin & Friends: Summer EP’ chu Zirtawpni khan a tlangzarh.

Contemporary Christian music singer Tomlin EP tharah hian single-a a tihchhuah tawh hla bakah hla thar pathum a awm a, Country singer lar tak tak a thawhpui leh a ni. A vaiin hla panga awmin, chung hlate chu streaming platform hrang hrangah ngaihthlak theihin a awm tawh a, Chris Tomlin zai ngainatute tan chuan a ngaihven chi viau ang.

Thomas Rhett leh Florida Georgia Line a thawhpuina hla, single-a a lo tihchhuah tawh 'Thank You Lord' pawh kha he EP-ah hian a dah a, Tyler Hubbard nena an sak 'Good To Be Loved by You' te, Russell Dickerson a thawhpuina 'Talk To Him' te, Jimmie Allen a thawhpuina 'Love People' bakah Russell Dickerson & Florida Georgia Line-te a thawhpuina 'Sing' te a dah a ni.

Nikum lama a tihchhuah 'Chris Tomlin & Friends' album kha kar hmasa thleng khan ram hrang hrang aṭangin vawi maktaduai 150 vel zet stream a ni tawh a, chumi a nih avang chuan tuna a EP thar pawh hian ngaihthlak a hlawh leh viau ang.

Kum 49 mi American singer hian August 13 aṭang hian 13-city amphitheater tour neih a tum bawk a, he tour-ah hian Kari Jobe, Bethel Music leh Cody Carnes-te pawh an inlan dawn a ni.

Chris Tomlin hi US-ah ringawt record mtd 7 chuang hralh thei a ni a, Grammy award hial pawh dawng thei a nih bakah GMA Dove Awards 23 lai a dawng tawh. Kum 2013-a a tlangzarh, 'Burning Lights' album phei kha chu Billboard 200 chart-ah topper a ni hial!

Chris Tomlin & Friends: Summer EP-a hla awmte
1 Good To Be Loved by You (ft. Tyler Hubbard)
2 Talk To Him (ft. Russell Dickerson)
3 Love People (ft. Jimmie Allen)
4 Thank You Lord (ft. Thomas Rhett, Florida Georgia Line)
5 Sing (ft. Russell Dickerson, Florida Georgia Line)