Billboard Album Chart : Eminem album hralh a kal ber

Eminem album 'Rivival' chu kar liam ta chhunga album hralh kal ber a ni a, Billboard Album Chart-ah pakhatna a ni.

American rapper hian a album hi December 15 khan a tlangzarh a, kar liam ta chhung khan US-ah ringawt copy 250,000 hralh chhuah a ni. Revival hian Billboard 200 Chart-ah pawh pakhatna a hauh mek bawk. Revival hi kum 2013 hnua album a tihchhuah leh hmasak ber a ni a, a tihlar nan tour pawh a nei zui dawn a ni.

Taylor Swift album 'Repu­tation' pawh hralh a la kal zui zel a, chart-ah pawh pahnihna a la hauh phak a ni. Swift hian hun eng emaw chen pakhatna a hauh hnuah hniam lam a pan a, tunah chuan album hralh kal ber pawl a ni leh tawh. Reputation hi Swift-i album parukna a ni a, hla 15 zet a awm a ni.

American rapper G-Eazy album 'The Beautiful & Damned' chu pathumnah a awm ve bawk.

Kar hmasa lama pakhatna Luke Bryan chu pariatna-ah a tla thla a, a album 'What Makes You Country' hralhna a thlahniam nasa hle. Hetih lai hian Garth Brooks album 'The Anthology: Part I' chu album hralh chhuah tam zingah a la tel zui zel thung. Ed Sheeran lar vanglai a tih ngam a, March thlaa tlangzarh 'Divide' album hi kum 2017 chhung khan hralh kal ber pawl a ni.