Box Office 2017-a sum lalut hnem ber Star Wars
Kum thar kan chuang kai ta a, nikum chhunga film chhuak hrang hrangte sum lakluh zat pawh a hriat theih ta. Kum 2017 chhung khan film chhuak a tam hle a, film hlawhlting leh sum lalut tam tak tak eng emaw zat an awm laiin, hlawhchham fe fe pawh an awm nawk mai. Box Office aṭanga an sum laklut zat tehnaah chuan Star Wars: The Last Jedi chu sum hailut hnem ber niin, $531,511,829 zet a lalut a ni.
Star Wars thar ber hi December thla khan tlangzarh chauh a ni a, heti chung hian kum 2017 chhunga film chhuak zinga sum lalut hnem ber a ni lawi si. Tlangzarh aṭanga kar khat chhungin $mtd 220 zet a la lut nghal thei a, box office-ah pawh pakhatna a ni nghal. Hei mai hi a ni lo a, kum 2002 hnu lama film chhuak tawh zinga tlangzarh kara sum lalut tam panga zingah a la tel cheu bawk.
Star Wars hian tun thlengin box office-ah sum lalut hnem ber dinhmun a la luah a, kar liam ta chhung pawh khan US-ah ringawt $mtd 52 zet a la lut leh a ni. He film siam nana an budget hi $mtd 200 a ni a, a sum lakluh hian an senral hi a khum chiang hle a ni.
Sum lalut tam zingah hian February-a tlangzarh Beauty and the Beast te, May thlaa tlangzarh Wonder Woman leh Guardians of the Galaxy an langsar a, heng bakah hian Spider-Man: Homecoming, Thor: Ragnarok, Despicable Me 3 leh Justice League te pawh sum lalut tam zingah an tel. Hetih lai hian boruak nei lian - Coco, The Shape of Water leh Lady Bird te chu sum lalut tam zual zinga tel lo langsar an ni.
