Nuai 1 lawmman awmna Biate faina pual film

Rs 1,00,000 lawmman awmna, Mizo­rama khaw fai ber Biate chungchang short film insiamsiak chu January 15 thleng thehluh theih a ni.

January 23-25 chhung hian Indian Film Festival (IFF) Mizo­ram neih a ni dawn. He mi pual hian Mizo­­rama khaw fai ber Bia­te chungchang short film insiamsiakna buatsaih a ni.

Mizoram sorkar leh Innovations India ṭang­kawpin an buatsaih tur IFF Mizoram chhung hian Biate chu Asia rama khawpui tê (small town) zinga fai ber a nihzia pholan tum a ni a, hei hi a zau thei ang bera puanzar a ni ang.

Lawmmanah pakhat­nain Rs. 50,000/- a dawng ang a, pahnihnain Rs. 30,000/- dawngin pathumnain Rs. 20,000/- a dawng ang a, an zavai hian merit certificate an dawng vek bawk ang.

Short film hi Eng­lish-a siam tur a ni a, Mizo-a siam a nih chuan a hnuaiah English-in ziah (sub title) tur a ni. January 15 hmaa thehluh tur a ni a, mimalin a mobile phone hmang pawhin short film hi a siam thei - hre chiang dun tan he mi link - http://innovationsindia.org/bi... - ah hian en theih a ni.