Grammy Award-ah Gaga leh Pink perform dawn

Kumtina sem ṭhin Grammy Award chu January 28 hian Madison Square Garden, New York City-ah sem a ni leh dawn a, he huna zaithiam inlan turte pawh puan a ni tawh. Recording Academy chuan Lady Gaga leh Pink-te an perform tur thu tun hnai khan a puang a, R'n'B singer Childish Gambino leh country super­star Little Big Town-te pawh an inlan tur thu an tarlang.

Lady Gaga chu a ṭum rukna atan Grammy Award-ah hian a inlan leh dawn a, a hmain ṭum nga zet a lo inlan tawh a ni! Gaga hi award dawng thei tura chhawpchhuah zingah a tel a, 'Best Pop Solo Performance' leh 'Best Pop Vocal Album' dawng thei turin a dinhmun a ṭha hle. Hetih lai hian 'What About Us' star Pink pawh award dawng thei tura hming chhawp chhuah zingah a tel bawk.

American country band Little Big Town chu award pathum - Best Country Album, Best Country Song leh Best Country Duo/Group Performance dawng thei dinhmunah an ding ve mek bawk. Gambino pawh a duai bik lova, Record of the Year leh Album of the Year award dawngthei zingah a hming a lang ve bawk.