Ṭhazual Lengzem : Duhaisam zawng neih theih lohna khawvelah

Mystical Mizoram Ṭhazual Lengzem chart-ah Jaui hla 'Dam Chhan' chu pakhatna a ni a, Jt Production 'Khuannu Ruat Loh' chu pahnihna a ni a, R. Lalruatkima 'Min Tuahrem Thuai Se' chu pathumna a ni thung.

Jaui 'Dam Chhan' pakhatna a ni
Faith Lalduatmawii hla phuah mawi tak, Jaui'n lungkuai taka thiam taka a sak 'Dam Chhan' chu Ṭhazual Lengzem chart-ah pakhatna a ni a, he hla hi a mawi bawka pakhatna nih hi a phu viau mai.

Ṭhazual award 2020-a Best Female Artist Lengzem award dawngtu Jaui hian February thlaah khan he hla mawi tak hi a tichhuak a, nimin thleng khan thlirtu nuai 3.7 chuang an awm tawh.

Jaui hla tihchhuah apiang hi a 'hit' emaw tih mai tur a ni a, tunlai lengzem artist zingah chuan huhang ngah ber pawl a ni bawk nen, hla lungkuai deuh emaw, hla thothang ṭha deuh a sa emaw pawh nise ngaihthlak a hlawh viau zel mai.

Chart hmasaah khan he hla hi pathumna a ni a, tunah erawh pakhatnaah a rawn inhlangkai ta a ni. He hlaah hian a hla danga a thawhpui ṭhin Hope music bawk a thawhpui leh a, a zai mai bakah music pawhin belchian a dawl hle a ni.

Pahnihna leh Pathumna chu
Jt Production 'Khuannu Ruat Loh' chu palina aṭangin pahnihnaah a rawn inhlangkai. Jt-a hi a hla tihchhuah apiang a lar zel a, ngaihthlatu an tam em em zel. Chumi a nih avang chuan chart leh lamah chuan dinhmun ṭha berah pawh a rawn ding thei tawh hial mai thei a ni.

R. Lalruatkima 'Min Tuahrem Thuai Se' chu pangana aṭangin top 3-ah a rawn inhlangkai ve bawk. He hla hi YouTube a tlirtu nuai 5 chuang nei thei a ni a, a duai lo khawp mai.

Chart-a lang an ṭha
Chama Thangluah & R. Lalhmingmawia 'Min Hruai ve Ang Che' chu palina a ni a, Hard Ray 'Ka Hmangaih Che' chu top 5 khartu a ni.

Siampuii Ralte, Jojo Jongte, Michelle Varte, KR Robert ft. Keimah Senes & Awmtea Polymer bakah Lilzo-te pawh top 10-ah an lang.