India mite ngaihven Van boruaka inkap chhuak tur 'Sirisha Bandla' chu

Andhra Pradesh-a piang India mi astronaut Sirisha Bandla chu July 11 hian van boruakah a inkap chhuak dawn. India hmeichhe zinga van boruaka inkap chhuak tur a ni bawk a, ngaihven a hlawh viau mai. Sirisha Bandla hi UK billionaire leh Virgin Galactic dintu Richard Branson rualin, midang pali nen Unity22 mission hmingpuin an chhuak ho dawn a ni.

Bandla hi Andhra Pradesh'-a Guntur district-ah piangin Houston, US-ah a seilian thung. Kum 2011 khan Purdue University, US aṭangin aeronautical engineering a zo a, George Washington University aṭangin kum 2015 khan MBA zo lehin chumi hnuah chuan Virgin Galactic hi a zawm a, tunah hian British-American spaceflight company-ah hian Vice President of Government Affairs a ni mek.

Kum 34 mi Sirisha Bandla chuan Twitter lamah Unity 22 crew zinga a tel thei chu a tan chuan chawimawina a nih thu a sawi a, Amazon dintu Jeff Bezos aiin van boruakah a inkap chhuak hmasa zawk dawn a ni.
Bandla leh Branson-te rual hian Virgin Galactic chief astronaut instructor Beth Moses leh lead operations engineer Colin Bennett-te bakah Unity spacecraft pilot tur Dave Mackay leh Michael Masucci-te chu an inkap chhuak ve bawk ang.

Rakesh Sharma, Kalpana Chawla leh Sunita Williams-te hnungzuiin vansangah hian a inkap chhuak dawn a ni a, India mi van boruaka inkap chhuak palina tur chiah a ni. India hmeichhe zinga van boruaka inkap chhuak hmasa ber chu Kalpana Chawla kha a ni a, kum 1997 khan Space Shuttle Columbia hmangin a inkap chhuak a ni. Mahse kum 2003 khan Space Shuttle Columbia flight tawpna, STS-107-ah khan chuang vein Khawvel boruaka an rawn luh leh dawna an khawl lama hatsatna awm avanga mi pasarih lai thi zingah khan a tel. Chumi avang chuan tuna India hmeichhia Sirisha Bandla a inkap chhuak leh tur pawh hian ngaihven a hlawh
zual hle.

India chhul chhuak hmeichhe zinga van boruaka inkap chhuak tur pahnihna