Golden Globe Award sem a ni ta

Kum tina sem ṭhin Golden Globe Award chu a vawi 75-na atan January 7, Pathianni zan khan, Los Angeles-ah sem a ni leh ta.

Award semah hian Holly­wood-a mipat hmeichhiatna chungchanga hmingchhiatna chuan hmun a awh lian hle a, thusawitute pawhin he lam hawi hian thu an sawi nasa hle. Mipat hmeichhiatnain film industry a tihmualpho thute, nakin zel atana thil pawi thei a nih thute chu an sawi uar hle hlawm a ni. Lifetime Achievement Award dawngtu Oprah Winfrey pawh he lam hawia thu sawi zingah hian a tel a, film industry-in hmingchhitna leh demna nasa tak a tawh mek chu pawi a tih thu a sawi uar hle. Winfrey thusawi hian khelzui a hlawh viau a, social media lamah chuan titipui ber pakhat a ni mek.

Hollywood Foreign Press Association buatsaih award semna hi American comedian, Seth Adam Meyers chuan a host a, a hmunah hian milar tel an ṭhahnem hle. Film leh Television category hrang hrangah award 25 zet semchhuah a ni. Show-ah hian 'The Big Little Lies' star te an langsar a, award pali zet an dawng. Nicole Kidman chu Best Actress atan thlan a ni a, Laura Dern chu Best Supporting Actress atan thlan a ni thung. Mipa lamah James Franco, Gary Oldman, Timothee Chalamet leh Tom Hanks te an langsar hle bawk.