Steve Bannon-an thupha a chawi

White House chief strategist hlui, Steve Bannon chuan lehkha pakhata US President Donald Trump-a fapa upa berin Russia mite meeting a neihpui chungchang, phiarrukna leh ram hmangaihna nei lo tia a sawi avangin Pathianni khan thupha a chawi.

Bannon hian news website Axios hnenah a thusawi dan avanga thupha a chawi thu hi a sawi a, "Donald Trump Jr hi ram hmangaihtu leh mi ṭha tak a ni. A pa pawh thurawn ṭha tak tak pein, kan ram siam ṭhatna kawngah pawh a pui a ni", a ti. President leh a hmalakna te chu a thlawp chhunzawm reng tih a sawi bawk.

The Guardian chanchinbu chuan kar kalta Nilaini khan 'Fire and Fury : Inside the Trump White House' tih lehkhabu-a Shannon-a thusawi hi a tarlang a ni. Shannon hian kum 2016-a Trump Tower-a Russian lawyer, Trump-a fapa leh a makpa-ten meeting an neih chungchang chu mawi lo takin a sawi a ni. A thusawi tihchhuah a nih hnu hian President Trump chuan a official statement-ah Shannon hi a rilru a buai zo nia a lan thu leh, a thusawi chuan sorkarah nghawng engmah a neih loh thu a tarlang ve nghal a ni.

White House Press Secretary Sarah Huckabee Sanders pawhin Michael Wolff-a lehkhabu,'Fire and Fury' hi na taka sawiselin, thu dik lo leh mipuite rilu hruai kawi tumna a ni, a ti.