Nitin ṭawngṭai ṭhin Mark Wahlberg

Hollywood actor Mark Wahlberg chuan nitina a hun hman ṭan hmain a ṭawngṭai hmasak ṭhin thu Today-a interview a neihnaah a sawi.

Tun hnai lawk khan Wahlberg channa film thar 'Spenser Confidential' chu tlangzarh a ni a, a film thar chungchangah hian Today chuan an kawm a ni. Wahlberg hi Catholic a ni a, lehkhabu chhiar leh ṭawngṭai a ṭulh ngaih loh laiin gym kal erawh kar khatah ni hnih a chawlh ṭhin thu a sawi. Heng a thil tih ṭhin avangte hian malsawmnate a dawn phah niin a inngai bawk.

Ṭawngṭaina avanga a talent dawnte hmang chhuak thei tura Pathianin chakna a pek ṭhin thu leh, ṭawngṭaina chuan thil ṭha leh ṭha lo thliar fel thiam thei tura a ṭanpui ṭhin thu a sawi uar hle. "Midangte ṭanpui theihna kawngah, pasal ṭha tak ka nih theihna kawngah leh pa ṭha tak ka nih theihna kawngah ṭawngtaina chuan min pui fo a ni," a ti.

Wahlberg-a film thar Spenser Confidential hi March 6 khan US-ah tlang­zarh a ni a, action comedy film a ni. American director leh producer lar Peter Berg chu director a ni bawk.