Golden Globe Award sem entu an tam

Kum tina sem ṭhin Golden Globe Award chu Pathianni zan khan The Beverly Hilton Hotel, California-ah sem a ni a, TV aṭanga award sem lo entu hi an ṭhahnem hle.

Golden Globe Award sem ṭum 75-na hi khawvel hmun hrang hrang aṭangin mi maktaduai 19 vel zetin an en anga chhut a ni. Music lam a ni emaw film pawh nise award sem hian thirtu a nei tam tawk lo ṭhin a, kuminah erawh TV aṭanga lo thlirtu hi an ṭhahnem hle a ni. Award sem hian darkar thum zet a awh a, TV aṭanga lo thlirtu tam ber hi kum 18-49 inkar an ni. Nikum khan he show lo thlirtu hi maktaduai 13.4 vel anga chhut a ni a, kuminah hian entu nasa takin an pung a ni. Golden Globe hi Grammy leh Oscar tih lohah chuan enhlawh ber a ni mek.

American comedian, Seth Adam Meyers chuan award semna hun hi a kaihruai a, lawm hlawh ber erawh American media proprietor Oprah Winfrey a ni. Oprah Win­­frey hian hmeichhia te dinhmun chawikan a pawimawh thu te, hmei­chhiate zahawmna humhim a ṭul thu te, thu­dik ṭan a, eirukna dolet leh mihringte dikna chanvo humhalh a ṭul thu te a sawi a, a thusawi hian sawizui a hlawh hle nghe nghe. A thusawi hi US president Donald Trump-a nupui Ivanka Trump pawhin ṭha a tih thu a sawi a, a ni bakah hian milar tam takin sawi ṭha an tih thu an sawi. Oprah hi US president thlan leh huna chuh ve tura duhtu pawh an awm nawk a, chung zingah chuan Lady Gaga pawh a tel.

A thu sawi aṭang hian kum 2020-a president thlan leh turah chuh a tum niin mi tam tak chuan an ngai ve bawk a, thlawptu pawh a nei nual dawn niin a lang. Lady Gaga chuan Oprah hi a vote tur thu a sawi a, milar eng emaw zatin an thlawp thu an sawi ve bawk.