Box Office : F9 a tlan chak zual zel $mtd 500 a tlan chhuak tawh

North America Box Office-ah film tlangzarh thar 'The Boss Baby: Family Business' leh 'The Forever Purge'-te awm mah se 'F9: The Fast Saga' bawkin sum a lalut tam leh ber a ni.

F9-in $mtd 500 a tlan chhuak tawh
Vin Diesel, Michelle Rodriguez, Tyrese Gibson, Chris "Ludacris" Bridges, John Cena, Nathalie Emmanuel, Jordana Brewster, Sung Kang, Michael Rooker, Helen Mirren, Kurt Russell leh Charlize Theron-te channa F9 chu a zawnin kar hnih chhung Box Office-a sum lalut tam ber a ni ta.

Tun kar tawp liam taah khan theatre 4,230 aṭangin $22,860,000 lai sum a lalut leh a, tlangzarh kara a sum lakluh nen North America Box Office aṭang ringawtin $115,963,960 a lalut tawh.

'F9: The Fast Saga' hi US-a tlangzarh a nih hmain ram hrang hrangah a che ṭha hle a, chung ram hrang hrang aṭanga a sum lakluh nen, nimin thleng khan $mtd 500.3 a lalut tawh a ni.

Kar hmasa lamah khan North America Box Office-a tlangzarh kara sum lalut tam ber record a lo siam tawh a, tunah phei chuan hrilen hnua Hollywood film, Box Office-a sum lalut tam ber a ni tawh. 'Godzilla Vs Kong' lo siam tawh chu a khum.

Pahnihna leh Pathumna film thar
Kar tawp liam ta chhunga film lalut tam pahnihna chu film thar 'The Boss Baby: Family Business' a ni a, theatre 3,644 aṭangin $16,040,000 a lalut.

Pathumna pawh film thar tho 'The Forever Purge' niin theatre 3,051 aṭangin $12,480,000 a lalut a ni.

Film thar a la tam lo zel
'A Quiet Place Part II' chu palinaah a tla thla ve thung a, 'The Hitman's Wife's Bodyguard' chu pangana a ni ve bawk.

Pahnihna leh pathumna bakah hian chart-a lang pha film thar dang pakhat a la awm a, chu chu pakuana 'Zola' niin kar tawp liam taah khan $1,230,000 lai sum a lalut a ni.

Kumin chhunga film sum lalut tam ber chu China film 'Hi, Mom' a ni a, pahnihna pawh China film tho 'Detective Chinatown 3' a ni. F9 hi sum lalut tam pathumna a ni.