Amazon CEO nihna Bezos-a'n midang kutah a hlan

Amazon dintu Jeff Bezos chu Thawhṭanni khan Amazon CEO a nihna aṭangin a bang a, kum 1997 aṭanga Amazon-a thawk tawh Andy Jassy hnenah he dinhmun pawimawh tak hi Bezos chuan a hlan a ni.

Company, $1.7 trillion vel zeta hlu chu Andy Jassy kutah hian a awm ta a, khawvel chuan eng angin nge Jassy hian he company hi a kalpui dawn a hre chak tawh hle. Amazon Web Services (AWS) CEO ni ṭhin Jassy hian Harvard-a a MBA zirpui ṭhinte nen kum 1997 khan Amazon hi an zawm a, a tirah chuan marketing manager-te a ni ṭhin. Kum 2003-ah khan Bezos nen hian cloud computing platform AWS chu an ngaihtuah chhuak a, he platform hi kum 2006 khan tlangzarhin Jassy hian a kaihruai zui a ni.

February thlaah khan Jassy hian Bezos-a dinhmun Amazon CEO nihna chu a luah dawn tih puanzar a lo ni tawh a, Thawhṭanni aṭang khan an puanzar lawk ang ngeiin Amazon CEO nihna chu a chelh ṭan ta a ni.