RFL Miss Mizoram 2020 Grand Finale-ah Hla thar nen Kimkima

Ṭhazual award 2019-a che ṭha tak, zaithiam leh hla phuah thiam ni bawk Kimkima chuan zanin hian a hla thar a tichhuak dawn.

Kimkima hla thar tur hi 'Ṭha Hming' tih a ni a, zanin hian a YouTube channel 'Kimkima Official'-ah a lyric video a dahchhuak dawn a ni. A hla lo tihchhuah tawhte ngaihtuahin 'Ṭha Hming' pawh hi a nalh leh hle ang tih a rinawm.

'I zun ngaih lunglen vangin' lyric video khan thlirtu maktaduai 6.5 a nei tling tawh a, Mizo hla YouTube-a thlirtu ngah ber zinga mi a ni hial. Chumai a ni loa, a hla tihchhuah tawh eng emaw zat chuan thlirtu maktaduai chuang a nei thei a ni. 

A hla tihchhuah hnuhnun ber 'Ka thinlung tan rukru' tih pawh kha thla hnih chhung lekin mi nuai 9 chuangin an thlir tawh a, Mizo mipuiin Kimkima an duh tih a chiang. Zanina a hla tihchhuah tur pawh hi a 'hit' leh ngei ang ti ila, kan sawisual tamin a rinawm loh.

Covid-19-in chiaina nasa tak a thlen mek karah Inrinni zan hian ruahman anga thil a kal a nih chuan RFL Miss Mizoram 2020 Grand Finale Dengṭhuama Hall, Muapuiah neih a ni dawn.

Hemi atan hian Miss Mizoram contestant-te pawh an inbuatsaih nasa tawh a, boruak pawh a sang chho viau. 

He hunah hian Kimkima hian a hla thar 'Ṭha Hming' hi a perform dawn a, mit leh beng a tlai ngei ang. Miss Mizoram contestant chhe lo tak takte Kimkima'n a awi tur hi hmuha ngaihthlak a chakawm tawh hle a ni.