Kar thum hnuah pawh Bad Boys bawk

Box Office-ah kar hmasa ang bawkin thil danglam lian tham thleng a awm lo a, Bad Boys for Life bawkin sum a lalut tam leh ber a, 1917 chu pahnihna ni lehin pathumnaah pawh Dolittle bawk a awm leh a ni.

Film ṭha chhuak thar a awm lem lo bawk a, char hma­saa top 3-te bawkin top 3 dinhmun an hauh leh.  Bad Boys for Life hian theatre 

3,705 aṭangin $17,682,959 a lalut phak a, kar thum zet a liam hnuah pawh a sum lakluh hi a la tam tham hle.

Oscar-a cheṭha tura rin 1917 bawk pahnihna a ni leh a, $9,497,235 lalutin $mtd 10 a lalut phak ta lo thung. Robert Downey Jr channa Dolittle pawhin a dinhmun ngai a luah leh thei a, a sum lakluh erawh a tlahniam ve hret hret thung a ni.

Film chhuak thar zingah chuan Gretel & Hansel: A Grim Fairy Tale a rawn cheṭha ber a, sum lalut tam palina a ni phak a, a sum lakluh erawh a tam lua lo thung. Gretel & Hansel thawnthu hi mi tam zawk chuan kan hre tawh ngei ang a, tun ṭuma mi erawh hi chu an kuai her a, a rapthlak zawngin an chang a ni.

German folklore tale Hansel and Gretel behchhan thoin siam mah se dawithiam pitar khawsa zia erawh a naupang thawnthu mil vak lo thung.

United States-ah chuan January 31 khan tlangzarh a ni a, theatre 3,007 aṭangin $6,154,007 a lalut a ni.

Gretel & Hansel a rawn inrawlh tak avangin chart hmasa ai khan an dinhmu pakhat zelin a tawlh hniam a ni mai a, film thar rawn inrawlh a tam lo a, an sum lakluh erawh a tlahniam ve zel hlawm a ni.

Top 10-ah Gretel & Hansel bakah hian The Rhythm Section a tel phak a, 10-na chiah niin top 10 a khar.