Facebook-in inremna dang ziak leh

Facebook chuan an huang an zauh zel a, tun hnaiah company dang nen inremna lian tham eng emaw zat an ziak ta.

A bikin music lamah huang zauh tumin hma an la nasa hle a, Ningani pawh khan music industry lian - Global Music Rights (GMR), SESAC HFA/Rumblefish leh Kobalt Music Publishing te chu inremna an ziahpui leh a ni. He inremna hmang hian Facebook, Oculus leh Instagram user te chuan video an post a, an share theih dawn bakah, songwriter te aṭangin right an nei thei dawn a ni. Hei hian artist zingah - Bruce Springsteen, Drake leh Bruno Mars te pawh a huam dawn nia tarlan a ni a, an phalna la kher loin user te chuan share chhawng turin right an nei thei dawn a ni.

Rumblefish president Michael Simon chuan Facebook nena inremna an siam thei ta chu lawmawm a tih thu sawiin, music industry pawhin hma a sawn phah ngei a beisei tih a sawi. Facebook hian music lamah youtube el pha turin nasa takin hma an la a, tun hnaiah pawh inremna lian tham an lo ziak nual tawh a ni.

Tun ṭuma inremna an ziah hma, nikum December 21 khan Universal Music Group leh Sony/ATV te chu inremna an lo ziahpui tawh a ni. Hei mai hi a ni lo a, Warner Music Group leh Sony Music Entertainment te chu $tld 1 hu inremna an lo ziahpui tawh bawk.