Bollywood legend Dilip Kumar a thi

Bollywood legend Dilip Kumar chu niminah khan kum 98 mi niin Mumbai-a Hinduja Hospital-ah a thi.

A ṭhian hnai tak Faisal Farooqui chuan Instagram lamah Dilip Kumar thih thu hi puangzarin,"Rilru hrehawm tak chungin, minute rei lo te liam taah khan kan ngaih tak Dilip Saab chu a boral ta tih ka puang a ni. Pathian aṭanga chhuak kan nih angin a hnenah bawk kan kir leh ṭhin a ni," tiin a tarlang.

‘Tragedy King of Bollywood' tia hriat lar ṭhin Kumar hian kum 50 chuang zet chu lemchan khawvelah sulhnu ropui tak tak a hnut chhiah a, comedy, drama, romance leh film genre hrang hrangah hnehsawh takin a chang ṭhin.

Aan, Daag, Devdas, Madhumati, Azaad, Mughal-e-Azam, Gunga Jamuna, Kranti, Karma leh Ram Aur Shyam-te chu a lemchan lar zual an ni awm e. Film 60 chuang laiah chang hmanin kum 1998-a tlangzarh Qila chu a film inlan tawpna a ni. A lemchanna pahnih Aag Ka Dariya leh Kalinga-te chu chang zo vek mah se tlangzarh a ni lo thung.

Padma Vibhushan Dilip Kumar
India sorkarin civil chawimawina a pek theih sang ber dawttu Padma Vibhushan chu Indian Cinema-a a thawh hlawk avangin kum 2015 khan a dawng a, kum 2000-06 inkarah khan Rajya Sabha member ni turin thlan tlin a ni bawk. Kum 1991 khan civil mi chawimawina sang Padma Bhushan pawh a lo dawng tawh a ni.

Filmfare Awards Best Actor category-a award dawng hnem ber a ni a, pariat a dawng. he record hi Shah Rukh Khan nen an la chelh dun mek a ni.

India lemchan thiam zinga award dawng hnem ber Guinness World Record a siam tawh bawk.

Maharashtra sorkar chuan kum 1979–1982-ah khan Sheriff of Bombay-ah a ruat a, Pakistan sorkar pawhin an rama civil mi chawimawina sang ber Nishan-e-Imtiaz (Order of Excellence) chu kum 1998 khan an hlan ve bawk a ni.

A hun hnuhnung
Dilip Kumar hi June 30 khan thawk lama harsatna a neih avangin damdawi-inah dah luh a ni a, June 6-ah pawh khan thawk lama hatsatna a neih avang bawkin damdawi-inah a lo lut tawh a ni.

Kumar hian prostate cancer a nei niin media ṭhenkhat chuan an tarlang a, chu chu a taksa peng hrang hrangah a ṭai darh niin an tarlang bawk.

Hindi cinema veteran hian a nupui Saira Banu a thihsan a ni.