Britney Spears conservatorship lawyer a bang!

Tunhnaia a conservatorship case chungchanga buai tak Britney Spears chu a manager Larry Rudolph a ban hnu lawkah a conservatorship lawyer Samuel Ingham III chu a bang ve leh dawn.

Samuel Ingham III hian Thawhlehni khan Los Angeles Superior Court hnenah a banna tur lehkha hi thehlutin court chu Britney Jean Spears tana attorney thar ruat turin a ngen zui bawk.

Ingham hi court-in Britney conservatorship case buaipui tura a ruat a ni a, kum 13 chhung vel lai chu Britney tan hian a ding tawh a ni.

June thla tawpa court-a Britney-i'n a thu a sawi khan a lawyer Sam chu hmalam panpui hlauhthawngah a puh a, khami hnu aṭang khan an inlaichinna hi a ṭha zui ta lo niin a lang. Britney-in a duhzawng a sawi hnuah khan Ingham hian a client duhdan ang a nih chuan a ban tur thu a lo sawi tawh nghe nghe.

Kar tirah khan Spears-i manager hun rei tak chhung lo ni tawh, Larry Rudolph chuan a ban thu a lo sawi tawh bawk. Kum 25 lai Princess of Pop manager a nih hnuah Rudolph chuan kar tirah khan kum hnih chhung vel zet chu Britney nen an inbe tawh lo tih tarlangin, a conservatorship chungchangah pawh a inrawlh lo tih a sawi.