East India Fashion Week-ah Mizo an che tha
East India Fashion Week 2018 chu Assam khawpui Guwahati-ah neih zawh a ni ta a, he huna tel Mizo designer, model leh zaithiam te an che ṭha hle.
Lakme Fashion Week leh International Fashioner Week (IFW) tangkawpten an buatsaih East India Fashion Week hi January 11-12 khan Taj Hotel Vivanta, Guwahati-ah neih niin, ram chhunga designer ṭha leh lar an fuankhawm. He hunah hian Mizoramn aṭangin designer pahnih - Engmawia leh Charlee Mathlena-te an tel a, model Emily Chenkual leh zaithiam Feli Fanai-te an inlan bawk.
Engmawia leh Cherlee Mathlena-te hian an collection an pho chhuak a, an kutchhuah an phochhuah lai hian Feli Fanai chuan zaiin a lo awi a, runway-ah model Emily Chenkual a inlan bawk. Mizo tel te hi an che ṭha hle a, boruak siamtu leh lawmhlawh hlawh ber pawl an ni.
He Fashion Week-ah hian India ram hmun hrang hrang - Delhi, Mumbai, Kolkata, Bihar leh Mizoram aṭangtein designer 24-te'n an collection an pho chhuak a. January 11 khan designer 12-te'n an kutchhuakte an pho chhuak a, a tuk January 12 khan 'Day Two' neih leh niin, designer 12-in an collection an pho chhuak leh a ni. Show hi chawhnu dar 2:30 aṭanga zan dar 10 thleng neih ṭhin a ni.
East India Fashion Week 2018-ah hian 'Escape Engmoia' label neitu Engmawia chuan 'Vintage Formal' collection a pho chhuak a, model mipa 11 leh hmeichhia 11-te'n a kut chhuak hi inbelin ramp an zawh. A collection phochhuah zingah hian Floral Print lam hmuh tur a tam zawk a, hmeichhia ho pawhin kekawr leh coat lam an ha deuh ber. 'Heritage Mizoram' neitu Charlee Mathlena pawhin 'Desert Nomads' collection pho chhuakin, Cotton Handloom - Puantah hmanga nipui (summer) thuamhnaw design hrang hrang a tarlang. Hnangtah hmanga siam 'Bag' leh eri Silk Stole-te pawh a pho chhuak bawk. Mathlena hi handloom leh silk lamah chuan India rama designer hriat hlawh pawl tak a ni.
East India Fashion Week hi Mizorama kan fashion show-te nen chuan a kalphung a inang chiah lo a, tun ṭumah hi chuan show neih zawhah 'Buyer' ho an kal khawm a, collection an duhzawng a awm chuan indawrna (deal) an neihpui nghal thin. Mizo designer te pawh hian dawrtu an nei nual a, tun thla tawpa Bangkok-a show neih leh turah pawh sawmna an dawng nghal bawk.
Feli Fanai a duai lo!
'Escape Engmoia' brand ambassador Feli Fanai chu designer ṭha leh model rual zingah pawh a duai lo hle a, boruak siamtu ber pakhat a ni. Feli Fanai hi model-te'n Engmawia kutchhuak inbela ramp an zawh laiin a perform a ni. Camila Cabello hla hit 'Havana' cover-in bul a ṭan a, thawm a ring tha hle. Hemi hnu hian a hla thulkhung - 'Pheichhemawi I khai ang' tih hmang ngeiin kal khawmte a awi leh bawk. Feli Fanai chuan, "Mi an tam avangin ka perform tur kha ka huphurh ve deuh. Mahse, ka zam duh bik lo a, ṭha takin ka hlen chhuak ta a ni" tiin a perform chungchang a sawi.
Model rual zingah Emily
East India Fashion Week-ah hian model 65 zet an inlan a, anni hian designer te kutchhuak an phochhuak a ni. Model rual zingah hian Mizo nula Emily Chenkual pawh telin, ani hi Mizoram aṭanga tel awm chhun a ni. Emily hian modeling lamah sulhun a lo nei nual tawh a, kum 2015-a Sunsilk Mega Miss Northeast tlanah khan 2nd runner up a ni. Tun ṭuma Fashion Show neih zawh takah pawh khan sawmna a dawn angin a inlan a ni.
East India Fashion Week-ah hian designer sawm bikte an tel a, show-ah hian Kaushik Ghosh chu Choreographer a ni. Amah hi Bollywood Fashion Show-a director hming langsar tak niin, khawvel hmun hrang hranga fashion show 2,500 chuang zet chu a lo choreograph tawh nghe nghe.