Mizoram kal ka châk tawh - Sushant Singh
January 23 tlaia Vanapa Hall-a kan hmuh theih tur, Bollywood actor leh TV show host Sushant Singh chuan Mizorama lo kal hun a nghahlelh tawh thu a sawi.
January 23-25 chhung hian Indian Film Festival Mizoram chu buatsaih a ni dawn a, Vanapa Hall-ah film hrang hrang en tur a awm reng dawn a, en man a awm lo ang. Heng film-te hi an chhuah dawn a ni satliah lo a, a film siamtu mi langsar tak takte hi Aizawlah an lo zin dawn a ni.
Sushant leh Mizoram
Tun hnai khan Indian Film Festival buatsaihtu Captain Rahul Bali nen CINTAA office Mumbai-ah an inkawm a, Mizoram-a kal a chak thu a sawi. Savdhan India avanga Mizo mipuite hriat lar em em chuan, "Mizoramah Savdhan India an en nasa tih ka lo hria a, mipuiin an ngaina tih ka hriatin ka lawm a, Mizorama kal hi ka chak tawh hle a ni," tiin a sawi.
Sushant chuan, "Mizoram sorkar leh Innovations India-in IFF Mizoram an buatsaih tur hi ka lawm a, Mizoram ang ram nuam leh mawi em em maia ka zin thei tur hi ka phur tawh khawp mai," a ti.
Mizoramah Savdhan India-in en a hlawh tih a hria a, "Mizo mipuite chungah lawmthu ka sawi a, kan show an ngaihlu tih ka lo hriatin Aizawla kal hi ka châk phah hle a ni," tiin a sawi.
Thukhawchang
Bollywood lam actor ni mah se TV show host atan sawm a ni a, a tirah TV show dang host tura sawm a ni a, hei hi a hlawhtling lo. He mi hnu hian 'Savdhaan India - India Fights Back' show tharah host atan an sawm a, hei hi a hlawhtlinpui ta hle a ni.
Sushant Singh chuan, "Actor ka ni a, film-ah chuan midang anga kan lan a ngai a, mi nungchang ang chan chhuah kan tum ṭhin. Tuna Savdhaan India-ah hi chuan Sushant Singh ka ni a, Sushant Singh-a kha ka lan chhuahtir a ngai ṭhin a ni," tiin a sawi.
India ram hmun hrang hrang a kalnaah Savdhan India avanga miin an hmelhriat thu leh, mi tam takin Savdhan India-a an tihchhuah ang chi an harsatna tawhte an sawipui hial ṭhin thu a sawi.
IFF kalphung
Innovations India hian Indian Film Festival hi khawvel hmun hrang hrangah an buatsaih ṭhin. A awmna hmun azirin IFF Russia, IFF Poland etc tiin a hming an vuah mai ṭhin a, tuna mi hi IFF Mizoram a ni.
A tum ber chu film siamtu director leh producer ṭha rualte Mizorama hruai a, mipuite en theiha an film chhuah piah lamah anni hian Mizoram mawizia leh nawmziate hria se, he ramah ngei hian film siam se, chu chu Mizoramin a lar phahin khualzin pawh a hip phah beisei a ni.
Khawvel hmun dangah pawh film kal tlang hian khualzin tam tak an hip a, chu chu Mizoramin tunah emaw, nakinah emaw a la tawn ve ngei beiseiin IFF Mizoram hi buatsaih a ni.