billboard : US-ah BTS 'Butter' a la lar reng

Billboard Hot 100 chart-ah BTS 'Butter' bawk pakhatna a ni leh a, he hla hi US mipuite hla play nasat ber a la nih chhunzawm zel. Album chart leh Artist 100 chart lamah Tyler, The Creator a langsar ber thung a, Olivia Rodrigo pawh a la lar chhunzawm zel.

Kar ruk hnuah pawh BTS 'Butter' bawk
BTS 'Butter' chu US single chart roreltu a la ni reng a, an tihchhuah aṭanga kar ruk hnuah pawh luahlan zo an la awm lo. Hot 100 chart-ah topper a ni leh.

He hla hi Billboard Global 200 chart-ah pawh pathumna a la ni phak a, Billboard Global Excl. Chart-ah pawh pahnihna a ni bawk. Artist 100 chart-ah BTS hi palina an ni mek bawk a, he chart-ah hian kar 247 zet an lang tawh.

BTS hi Billboard Hot 100-a group anga No.1 ni rei thei ber a ni hial tawh a, chutiang record ropui chu an siam thar leh der tawh a ni. Chumai chu a la ni lo, tlangzarh aṭanga kar ruk chhung Hot 100 topper a zawna ni char char thei hla hi 10 pawh a la awm tling lo a, chung zingah chuan 'Butter' hi a tel leh der tawh bawk.

Digital Song Sales chart-ah pawh 'Butter' hi pakhatna a ni mek. YouTube-a thlirtu an neih tam chak lam phei chu ziak lang tawh lo mai ang.

RM, Jin, Jimim, J-Hope, JungKook, SUGA leh V-te chuan an Twitter account kaltlangin hetiang an thlen theihna chhan an fans ARMY-te chungah lawmthu sawina pawh tichhuak tawhin "#BTS_Butter HUGE thanks to #BTSARMY We Purple You" tiin an tweet.

Billboard chart luahlumtu midang
Tyler, The Creator chuan a album thar 'Call Me If You Get Lost' chu pakhatna a nihpui a, ani hi Artist 100 chart-ah 48-na aṭangin pakhatnaah a rawn inhlangkai nghal bawk.

Olivia Rodrigo chu chart hrang hrangah a la che ṭha zel a, top 5 chung lamah a album leh a hlate a la chuankai pui vek. Artist 100-ah pahnihna a ni mek a, Billboard Global 200 chart-ah phei chuan pakhatna a ni.

Ed Sheeran 'Bad Habits' chu Hot 100 chart-ah pangana a ni phak ṭawk thung a, Billboard Global 200 chart-ah pahnihna niin Billboard Global Excl. Chart-ah pakhatna a ni thung.