RFL Plastic Miss Mizoram 2020 Open Audition-ah mi pakua inlan

Mizoram Journalist Association leh Zonet Cable TV buatsaih 2020 Miss Mizoram atana Open Audition chu nimin khan neih a ni a, mi pakua an inlan. Zaninah final round a tlingte puan a ni ang a, naktuk zanah 2020 Miss Mizoram Khuhhawnna neih nghal a ni ang.

Open Audition-ah judging panel a ṭhu tur mi pali- Lucy Sailo, Susan R.Ralte, Rody H Vanlalhriatpuii leh Vanlalrema Vantawl-te'n audition-a inlan te kawmin rampwalk leh measurement-te tih a ni.

District hrang hrangah MJA hmalaknain district aiawh tur ‘Miss’ thlan fel an ni tawh a, district 10 aiawh turte pawhin Aizawl an thleng khawm tawh. Aizawl district bik tan district aiawh thlan a ni ve lo a, open audition neih a ni thung. Open audition-ah hian district dang aṭang pawhin tel theih a ni a, nimin audition-ah pawh hian Saitual leh Lunglei district aṭanga tel te pawh an awm a, Mizoram pawn, Shillong aṭangin pakhat a inlan bawk.

Open Audition-a tling te leh district aiawh thlan chhuahte chu Ningani zan hian TV-ah ‘Miss Mizoram Khuhhawnna’ neiin an inlan tawh dawn a ni.