Indian Film Festival Mizoram kaltlangin Khawvel zau zawkah Mizoram phochhuah tum

January 23-25 chhung hian Indian Film Festival Mizoram chu Aizawlah neih a ni dawn a, inbuatsaihna kalpui mek niin he hun remchang hmang ṭangkai hian khawvel hmun zau zawkah Mizoram hming chu puanzar a nih beisei a ni. He hunah hian film siamtu langsar tak tak an lo kal dawn a, chung zingah chuan Rahul Mittra pawh a tel.

Festival chhung hian Biate chu Asia-a khawpui tê (small town) zinga fai ber a nih puan a ni dawn a, India rama a zau thei anga puanzar a, mipui tam zawk Biate leh Mizoram tlawh tura hip thei tura hmalak tum a ni. Mizoram hmunhmate chu film siamtute'n hmu se, film-te siamin ram zau zawkah Mizoram phochhuak se, chu chu tourism lama puitu pawimawh tak a nih beisei a ni.

Rahul Mittra a tel
India rama film leh media lama mi langsar Rahul Mittra chu Indian Film Festival Mizoram-ah a lo tel thei dawn a, 'celebrity guest' a ni ang.

Journalism khawvela hming chher tak, film siam lama hlawhtling leh management lama hnu hma hrawl tak nei Mittra hi Wave Cinemas lama CEO a ni a, media, entertainment, brand management leh corporate com­municationm lama tawnhriat nei leh ram chhunga mi langsar ni phak a ni.

Bollywood lamah producer niin film lar ṭhenkhat Saheb biwi aur Gangster, Saheb biwi aur Gangster Returns, Bullett Raja, Revolver Ran leh Sarkar 3-te hi ama tih chhuah a ni.

Award lian tham ṭhahnem tak a lo dawng tawh a, Brandsmith and Brand­smith Motion Pictures dintu a ni bawk.

Mittra chuan, "Mizoramin Indian Film Festival a thleng tur hi ka lawmpui a, hei hian Mizoram hi ram chhung leh ram pawn hmun dangah a ṭha zawngin a tilar ang a, Mizoram hian kawng tam takah a hlawkpui ngei ka beisei," tiin a sawi.

Mipuite hun
Mipuiin he Indian Film Festival hi an chhim theih dan tur duan a ni a, Vanapa Hall lamah flim chhuah a ni ang. He hunah hian film lar apiang thlan a ni dawn chiah lo a, Mizorama lo kal film maker-te film chhuah a ni ang - mipuiin a thlawnin an en thei ang.

Heng zingah hian ni khata cheng vaibelchhe 7 chuang lalut thei 'Sarkar 3 film' pawh a tel a, Amitan Bhachan channa flim a ni a, a producer chu Aizawla lo kal tur Rahul Mittra hi a ni.

Vanapa Hall lamah hian Mizo­rama mipui nawlpuiin an hmelhriat Shaavdhan India host Susanth Singh pawh a inlan dawn a ni.