Mission: Impossible 7 channa atan 'Covid-19 free village' din tum

Mission: Impossible 7 pro­duction chu hripui leng vanga hun eng emaw chen chawlhsan lailawk a nih hnuah September thla aṭang hi chuan chhunzawm leh an tum tawh tih a changtute zinga mi Simon Pegg leh assistant director Tommy Gormley-te'n an sawi.

Mi7 hi February thleng khan Italy-ah an chang hman a, mahse Europe ram hrang hrang leh a bikin Italy chu hrileng zualna hmunah a chan chhoh tak avangin tiam chin awm loin production chawlhsan a nih thu an puang a ni. A tirah tak chuan London lamah chan chhunzawm an tum a, mahse UK-ah pawh hri nasa taka a len tak avangin an chan chhunzawm thei ta lo a, tunah erawh chanchin thar lawmawm lam an nei thei ta thung.

Thawhlehnia BBC Radio 4 Today programme-a an kawm­naah Tommy Gormley chuan September thlaah chuan production chhunzawm theih an beisei tih a sawi a ni.

Mission: Impossible 7 siamtu lam chuan film an chan chhunzawm theihna tur hian 'Covid-19 free village' din an tum tih thawm a awm.

England chhim chhak lama awm  Oxfordshire-a RAF site rauhsan tawh chu cheihnuma 'Covid-19 free village'-a siam an tum a ni. The Sun newspaper Bizarre column-a tarlan a nih dan chuan film production hi nasa takin an tikhawtlai tawh si a,  hrilengin ziaawm lam a pan lawk hmel bawk si lo nen, a rang thei ang bera film chan an chhunzawm theihna tur chuan 'Covid-19 free village' din mai loh chu kawngdang an nei lo.

Hotel room-te pawh tun dinhnunah chuan a chan hleitheih bawk si lo nen, hun rei zawk an tikhawtlai duh a nih loh chuan film channa tur hmun thar hi an din chawp mai hi an tan a ṭha zawk niin an tarlang.

Mi7 chan chhunzawm tur hi film industry tan chuan thu lawm­awm tak a ni ngei ang. Hripui leng vanga film industry a chawlh ṭhuap kara budget sang film chan chhunzawm thuai a ni tur hi film lam tuipuite tan pawh thu lawm­awm tak a ni dawn tih a chiang.