Facebook Live Videos Chart-ah U2 an sang ber

Irish rock band U2 chuan Billboard Facebook Live Videos Chart-ah dinhmun sang ber an luah a, December thla chhunga Facebook Live-a entu ngah ber an ni.

U2 hian High Line, New York-ah an hla hit 'Get Out of Your Own Way' an perform a, hei hi December thla chhung khan mi maktaduai 10 dawiin an thlir a ni. Chart hi Facebook Live-a viewer, comment, share leh react an ngah dan aṭanga teh niin, tehna hrang hrangah hian U2 hi khum thei an awm lo a ni. U2 hian an album 17-na 'Songs of Experience' chu December thla khan an tlangzarh a, an boruak len lai a ni.

'Songs of Experience' hi Billboard Album chart-ah pawh pa­khatna a ni a, kar khat lek chhungin US-ah ringawt copy 186,000 zet hralh a ni.

'Get Out of Your Own Way' hi an album thara mi niin, New York-a an perform-na video hi kar khat chhungin entu maktaduai 9.7 zet awmin, share pawh 50,000 lai a awm bawk.

Chart-a pahnihna chu Bob Marley a ni teh daih a, kum 1976-a Kingston, Jamaica-a a concert video chu mi 469,000 zetin an en a ni. Bob Marley hi kum 1981 khan a thi a, mahse tun thlengin a hlate chuan ngaihhlut an la hlawh a ni. Top 10-a lang zingah hian Gwen Stefani leh David Guetta bakah, Indian singer A.R. Rahman te pawh an lang. Billboard chuan Facebook Live Videos Chart hi mumal takin a kalpui a, thla tin chart hi tihchhuah ṭhin a ni.