BTS hla thar a 'hit' lehnghal

Bangtan Boys chuan niminah khan an English single pathumna 'Permission to Dance' an tichhuak a, an tihchhuah aṭanga darkar thum pawh a ral hmain YouTube-ah thlirtu maktaduai 19 chuang an awm hman!

'Permission to Dance' hi a hla a mawi a, ngaithlak a manhla hle. 'Butter single CD Version' an tlangzarh rualin an hla thar hi an tichhuak a, ram hrang hrang chart-ah tlar hmasa berah a ding leh dawn tih a chiang nghal.

Nimina an hla thar tihchhuah hi Ed Sheeran, Steve Mac, Johnny McDain leh Jenna Andrews-te'n an phuah ho a ni a, a hla a thothang ṭha a, a hla thupui ang ngeiin 'phalna la kher lo pawhin lam a rem nghal thlap' mai.

RM, Jin, Suga, J-Hope, Jimin, V leh Jungkook-te cowboy thuam inbela thlalera an lam vel chuan Army ho thinglung a tituiral leh dawn tih a hriat sa. Fanbase nei ṭha BTS hian record ropui tak tak an hla thar hmang hian an rawn siam leh mai thei a ni.

Tunah hian Billboard Hot 100 chart-ah an hla tihchhuah hmasa zawk 'Butter' kha topper a la ni mek a, tuna an hla tihchhuah lah a mawi leh bawk si a, BTS hmingin Billboard chart lam pawh a luah hneh leh hle dawn a ni.