Indian Film Festival Mizoram a hnai ta

Naktuk tlai hian Indian Film Festival Mizoram chu Vanapa Hall-ah ṭan a ni dawn ta. Shavdhan India star Susanth Singh a inlan dawn a, dar 5:00-ah mipui a duh apiangin a hawnna hi a chhim theih ang - January 24-25 chhungin Aijal Club-ah a thlawnin film hrang hrang a en theih dawn a, a film siamtute nen a inkawm pah theih dawn bawk.

January 23-ah Susanth hoin a hawnna mipui tan
Thawhlehni tlai dar 5:00-ah Vanapa Hall-ah Indian Film Festival Mizoram hi hawn a ni dawn a, chief minister Lal Thanhawla'n a hawng ang. A hawnna hun hmang tur hian Mizote hmelhriat lar Susanth Singh chu Mumbai aṭangin a lo kal dawn a - mipui a duh apiangin a hawnna hi a thlawnin an chhim thei ang.

He hunah hian Biate khaw faina pholang thei tura short film siam intihsiak lawmman sem a ni ang a, mipui en theihin chhuah a ni ang.

Hei mai hi a ni lo, Bollywood super star Amitabh Bachan channa Sarkar 3 chu chhuah a ni ang. Ni khata vaibelchhe 9 lalut thei film Sarkar 3 producer Rahul Mittra chu he hunah hian a inlan dawn a, amah kawmna leh film sawi zauna hun a nei dawn a ni.

January 24 aṭangin Aijal Club lamah
January 24 & 25-ah hian mipui a duh apiangin a thlawna an en theih turin film hrang hrang chhuah a ni dawn. Film hi an chhuah dawn a ni mai lo a, a siamtute kawm theihin an awm nghal zel dawn a ni.

January 24-ah Gujarati film Wrong Side Raju chhuah a ni ang a, hei hi English subtitle a awm dawn a ni. Aijal Club-ah dar 1:00-ah chhuah ṭan a ni ang a, he flim director Mikhil Musale chu kawm theihin a awm dawn bawk.

Tlai dar 4:00-ah Bollywood film lar 'Oh My God' chu chhuah a ni dawn a, English sub title a awm ang. Hei hi Director Umesh Sukhla chuan a awm chilh dawn a, amah kawmna hun a hman theih nghal ang - a duh apiang tan a thlawna chhim theih vek a ni.

January 25 - Nunna Thar nen
January 25-ah Aijal Club lamah film hi chhuah chhunzawm zel tur a ni, film chi hrang pathum chhuah tur zingah Nunna Thar pawh a tel.

Zing dar 10:00-ah Assamese film 'Raag' chhuah a ni dawn a, English-in a inziak vek dawn a, a hmuhnawm ang. Hei hi a phurawm dawn - a changtunu ber Zerifa Wahid chu a hmunah a awm dawn - Assamese filmstar hmelṭha hi a hmuh theih dawn a ni.

Dar 1:00-ah Marathi film Ventilator chhuah a ni ang a, a director Rajesh Mapushkar a awm dawn avangin a biak rawn theih dawn a, a hlawkthlak hle tura ngaih a ni.

Dar 4:00 a ni ang a, Aijal Club-ah Nunna Thar a en theih dawn. He Mizo film lar tak chhuah a nih chhung hian a director Mapuia (Leitlang Pictures) chu a hmunah a awm dawn a ni.

Sawihona khunkhan zawk
January 24 (Nilaini) chawhma lam hian Convention Centre, Beraw-ah film siamtute nen inkawmna remchang siam a ni ang. Mizoram ah ngei film an rawn shoot theihna tura sawmna hunte, a ṭha zawnga Mizoram pho chhuahna hunte neih a ni ang a, Mizoram lam aṭangin presentation-te neiin film maker-te hip thei tur pholan a ni ang.

Film siamtute pawh­in an tawnhriatte sawiin Mizoramin film lama hma a sawn theihna tur mai bakah, India ram leh ram zau zawka Mizoram chanchin ṭha lam phochhuah dan turte an sawi dawn a, sawiho­na hun neih a ni bawk ang.

He hun bik hi chu mipui nawlpui huap a ni dawn lo a, sawm bikte pual a ni thung ang.