Vawiin tlaiah Vanapa Hall-ah Susanth Singh hoin IFF Mizoram hawnna

Vawiin tlai dar 5:00-ah Vanapa Hall-ah mipui a duh apiang kal khawm theih a ni - Indian Film Festival Mizoram hawn a ni dawn. Actor Susanth Singh bakah film producer leh director-te hmuh tur an awm ang.

Chief Minister Lal Thanhawla'n Indian Film Festival Mizoram hi dar 5:00-ah a hawng ang a, ṭhutna ṭha duh tan dar 4:00 vela hall chhung luh ṭan a finthlak ang.

Starring Susanth Singh!
Savdhaan India avanga Mizo mipuite hriat lar em em Susanth Singh hi vawiin tlaiah Vanapa Hall-ah hmuh theih a ni dawn.

March 9, 1972-a piang actor hian nihna hrang hrang a nei nual - Bollywood lamah hming chher viau mah se Mizo mipuiin kan hmelhriat dan ber chu TV presenter niin, Savdhaan India hi Susanth kan hmelhriatna a ni.

Susanth chuan, "Mizoram kal hlan ka nghakhlel tawh a, Savdhaan India-in lawm a hlawh thu min hrilh hi ka lawm khawp mai. TV programme dang ang lo takin Savdhaan India hi a ṭha zawnga mi kaihruaitu ṭangkai tak a ni a, mimal pawhin miin a ṭha an tih thu min hrilh nual tawh a ni," tiin a sawi.

Hmuhnawm chi hrang hrang
Vawiin tlai hian Biate faina puala film insiamsiaka a tiṭha pathum hnenah lawmman hlan a ni dawn - heng short film-te hi Vanapa Hall-ah enho a ni bawk ang.

Bollywood super star Amitabh Bachan channa 'Sarkar 3' chu chhuah a ni ang a, English sub title a awm dawn mai a ni lo - he film producer Rahul Mittra a inlan bawk ang. Mittra hi Wave Cinema-a CEO a ni a, film khawvela hriat hlawh leh tawnhriat ngah tak a ni.

January 24 & 25-ah hian Aijal Club lamah mipui a duh apiangin a thlawna an en theih turin film hrang hrang chhuah a ni dawn - English subtitle a awm zel dawn piah lamah film siamtute kawm theihin an awm ṭhin ang.

January 24-ah Aijal Club-ah dar 1:00-ah Gujarati film Wrong Side Raju chhuah a ni ang a; tlai dar 4:00-ah Bollywood film lar 'Oh My God' chu chhuah a ni ang - director Umesh Sukhla kawm theih a ni ang.

January 25-ah zing dar 10:00-ah Assamese film 'Raag' chhuah a ni dawn a, a changtunu ber Zerifa Wahid chu a hmunah a awm ang. Chhun dar 1:00-ah Marathi film Ventilator chhuah a ni ang a, Ningani tlai dar 4:00-ah Nunna Thar a en theih bawk ang.

Hmuh ngai loh Mizoram
Film siamtu liante tan mipui nuai 10 vel lek awmna state, movie theatre pawh nei lo state-a kal hi thil hlawk vak a ni lo mai thei a; nimahsela he IFF Mizoram buatsaihtute chuan film siamtute hi an la hmuh ngai loh ram Mizoramah ngei hruai thlen a, a mawizia leh a nawmzia hria se an duh.

Innovations India hotupa Captain Rahul Bali chuan, "Mizoram mawizia leh nawmzia hi film siamtute hian a takin rawn hmu ngei se kan duh. Hei vang hian theihtawp chhuahin film siamtute hi kan dawr a ni. Harsatna tam tak a awm a, anni tan Mizorama kal hi a tirah chuan thil chakawm a ni lem lo a; nimahsela film siam theihna tur khawpa hmun mawi a nihzia kan sawi a, Italian film maker thlengin an lo kal thei dawn ta a ni," tiin a sawi.

Bali chuan, "Film pumpui an rawn shoot lo a nih pawhin an film ṭhenkhata Mizoram an tihlan zeuh chuan khualzin hipna hmanraw ṭha tak a ni ang a, ram pum huapa Mizoram pholanna hun remchang ṭha tak a ni ngei ang," a ti.