SAG award-ah Nicole Kidman langsar

Kum tina sem ṭhian Screen Actors Guild (SAG) award chu Pathianni zan khan Los Angeles-ah sem a ni a, film leh television lama mi hlawhtling leh thil titheite hnenah award hi hlan a ni. Nicole Kidman chu SAG award-a mimala langsar ber tih ngam a ni a, Best Actress Limited Series/TV Movie hlan a ni.

Kumin hi SAG award sem a nih ṭum 24-n a ni a, a vawi khat nan Kristen Bell chuan a host. Kristen Bell-i hi a tir lamah chuan a zam ve deuh tih a hriat theih a, mahse ṭha takin a mawhphurhna a hlen chhuak thei a ni. Show hian hlut a hlawh viau a, TV lam aṭanga lo thlirtu pawh an ṭhahnem hle. Category hrang hrangah award hi sem niin, mi lar inlan an ṭhahnem hle. Game of Thrones, Three Billboards Outside Ebbing, Missouri, Darkest Hour, Veep, Big Little Lies leh Wonader Woman changtute an langsar viau a, award pawh eng emaw zat an hum haw a ni.