Hontrade Ṭhazual Lengzem : A chung berah 'Hmangaih Mengmawite'

F. Zomuanpuia leh HT Lalthanzami-te'n thiam taka an sak 'Hmangaih Mengmawite' tih hla chu Hontrade Ṭhazual Lengzem-a thlan hlawh ber niin, chart-ah pakhatna a ni.

F. Zomuanpuia leh HT Lalthanzami te hi chart-ah an lo lang dun fo tawh a, mahse dinhmun sang ber erawh an la luah ngai lo. Tun ṭumah erawh tuma tluk rual lohin pakhatna an ni ta a, eng chen nge he dinhmun hi an luah dawn tih chu hla thlangtute kutah a innghat a ni. 'Hmangaih Mengmawite' tih hla hi nikuma tlangzarh kha a ni. Chart-a pahnihna chu PUC Various Artists an ni a, 'Zoram Rohlu PUC' tih hla hmangin he dinhmun hi an luah. Hla lungkuai leh lung tileng thei tak mai hian Pachhunga University College-a zir mekte leh zirchhuak tawh te lairil a fan a, thlir nin harsa tak a ni ngei ang.

Ṭum eng emaw zat pakhatna lo ni tawh Kimkima chu pathum-naah a awm a, a hnuaiah hian HT Lalthanzami leh Jenny Jathang te an awm. Kimkima hian 'Sarah, I zunzam' tih hla hmangin Zohnahthlakte min awi tlei a, a hla pawh hian thlan a la hlawh zui zel a ni. Top 10-ah hian hmel thar hmuh tur an awm nual a, Jenny Jathang, H. Lalvulmawia, Richard Chawngthu leh Isaac Khawlhring te hi mi nawlpui la hmelhriat lutuk loh an ni. Hetih rual hian a sang 10 zinga invawrh kai thei an nih miau avangin chart-ah kan hmu zui zel a nih pawhin a mak lo ang.

Hun rei tak chhung chart-a lo lang tawh - Feli Fanai, Zorinzuali Khiangte leh Henry Lalmalsawma Renthlei te hming a lang tawh lo thung.