Box Office-ah Jumanji khum thei an la awm lo

Dwayne "The Rock" Johnson channa 'Jumanji : Welcome to the Jungle' chu sum lakluh tam lamah khum thei an lo awm lo a, a zawna a ṭum thum nan Box Office-ah pakhatna a ni leh ta.

He adventure film hian kar liamta chhung khan US-ah ringawt $mtd 20 a la lut leh a, a sum lakluh tawh zawng zawng chu $mtd 666.2 zet a tling tawh a ni. Jumanji hi nikum December 20-a tlangzarh kha niin, sum lakluh tam lamah khum thei an la awm loh avangin Box Office-ah roreltu a ni mek. A zawna

ṭum thum zet sum lalut tam ber ni thei film siam nan hian $mtd 65 vel sen ral a ni a, a sum lakluh tawh aṭanga teh chuan film hlawhtling tak tia chhal theih a ni. A changtute pawh Karen Gillan, Dwayne Johnson, Kevin Hart leh Jack Black te an ni nawk a, sum a hailut hnem hi thil mak a ni lo.

Box Office-a pahnihna chu Chris Hemsworth leh Spanish actress Elsa Pataky te channa, 12 Strong niin, a sum lakluh zat chu $mtd 16.5 a ni. January 18-a tlangzarh drama/action film hi puitling lamah a tla na zawk a, a entu tam zawk chu kum 25 chung lam an ni. Sum lalut tam pathumna chu Den of Thieves niin, a hnuaiah hian The Post chu a awm. An sum lakluh zat hi $mtd 15.3 leh $mtd 12.2 a ni. Hetih lai hian Billboard Album chart lama che ṭha tak The Greatest Showman chu Box office-ah a ropui teh chiam lo a, kar liamta chhung khan $mtd 11 lalutin, December-a tlangzarh a nih hnua a sum lakluh tawh zawng zawng chu $mtd 194.7 a ni.

Sum lalut tam zingah hian December 12-a tlangzarh Star Wars: The Last Jedi pawh lang lehin pariatna a ni. Box Office-a hun eng emaw chen pakhatna lo luah tawh Star Wars hi sum lakluh tam lamah chuan a duai lo hle a, $tld 1.265 zet a hailut tawh a ni. Paddington 2, The Commuter, Insidious: The Last Key leh Forever My Girl te chu sum lalut tam zual 10 zingah an lang bawk.