Vawiinah Aijal Club-ah Film pahnih a thlawnin en theih

Indian Film Festival Mizoram chu nimin tlai khan Vanapa Hall-ah

ṭan a ni ta. Vawiin hian Aijal Club lamah film hmuhnawm tak tak a thlawna en theihin a awm dawn a, English sub-title a awm dawn avangin Mizo mipui nawlpui tan pawh hriatthiam theih tur a ni.

Vawiin chawhma dar 11 aṭanga hian sawm bikte tan Convention Centre, Beraw-ah film siamtute nen inkawmna remchang siam a ni. Mizoram lam aṭangin presentation-te neiin film maker-te hip thei tur pholan a ni ang a; film siamtute pawhin an tawnhriatte sawiin Mizoramin film lama hma a sawn theihna tur mai bakah, India ram leh ram zau zawka Mizoram chanchin ṭha lam phochhuah dan turte an sawi dawn a, sawiho­na hun neih a ni bawk ang.

Kan hmuh turte
Vawiin hian chawhnu lam aṭangin Aijal Club-ah film a en theih ang. Gujarati film Wrong Side Raju chhuah a ni ang a, hei hi English sub-title a awm dawn a ni. Aijal Club-ah dar 1:00-ah chhuah ṭan a ni ang a, he flim director Mikhil Musale chu kawm theihin a awm dawn bawk.

Mikhil hi film lama mi ril a ni a, India ram aṭanga Oscar Awards nominee-a tel thei tur thlangtu zinga mi a ni a, India ram huapa lawmmante pawh lo dawng tawhtu a ni.

Tlai dar 4:00-ah Bolly­wood film lar 'Oh My God' chu chhuah a ni dawn a, English sub-title a awm ang. Hei pawh hi Director Umesh Sukhla chuan a awm chilh thei tura ngaih a ni a - a duh apiang tan a thlawna chhim theih vek a ni.

Naktukah hian zing dar 10:00, chhun dar 1;00 leh tlai dar 4:00-ah film chi hrang hrang en theihin a awm bawk ang.