Vawiinah Jonghyun album tlangzarh dawn

South Korean singer Jongh­yun album chu vawiin hian tihchhuah a ni dawn. Korean boy band SHINee member Jonghyun hi nikum December 18 khan a thi a, a thih chhan hi Carbon mono­xide poisoning nia tarlan a ni.

Jonghyun-a label SM Entertainment chuan January 19 khan a album 'Poet/Artist' tlangzarh a nih tur thu hi an puang a, nimin aṭang khan a track leh special music video te chu online-a lei theih turin chhawpchhuah a ni. SM Entertainment chuan Jonghyun hian a album hi kum thar tir lamah tlangzarh a tum tih an sawi a, mahse vanduaina a tawk ta a ni. Heti chung hian ruahmanna a lo siam tawh hi tihhlawhtlin sak an tum tih, SM Entertainment chuan an sawi.

Thuchhuah an siamah chuan, "Jonghyun hian music a ngaina em em a, a engkima engkim a ni. Hetiang mi hi music khawvelah hmuh tur a awm tawh si lo a, a hla hian amah ngainatute a tihlawm ngei kan beisei a ni" tiin album tlangzarh an tum chhan an sawi. Heta ṭanga an sum hmuhte hi a nu hnenah hlan a ni ang. SHINee pawhin an member Jonghyun-a album tlangzarh a ni tur chu lawmawm an tih thu an sawi ve bawk.

SHINee hian member kim tawh lo mah se band anga chet chhuah zui zel an tum a, thla thar khian Japan-ah concert an nei dawn a ni.