Lemchan khawvelah Dua Lipa kan hmu dawn

British singer Dua Lipa chu lemchan khawvelah a inlan dawn a, Mathew Vaughn-a spy thriller film thar tur 'Argylle'-ah a inlan dawn a, hei hi lemchan lama a inlanna hmasa ber tur a ni.

Pop singer lar, Grammy award hial pawh lo dawng tawhthu Dua Lipa chanpui turte pawh an lar hlawm rem rem hle a, A-List Hollywood star ṭhah an ni dawn. Henry Cavill, Sam Rockwell, Bryce Dallas Howard, Bryan Cranston, Catherine O’Hara, John Cena leh Samuel L. Jackson-te kiangah a inlan dawn a ni. Chumai a la ni lo, he film soundtrack pawh hi a buaipui nghal bawk ang.

Tlangzarh mai tur Ellie Conway ziah spy novel 'Argylle' behchhanin he film hi chan tur a ni a, a francise film pathum tal siam an tum a, 'Argylle' hi a hmasa ber tur a ni.

He film hi August thlaah hian Europe lamah an chang ṭan ang.

Kingsman franchise director Vaughn chu director tur a ni a, Wonder Woman leh Ice Age: Continental Drift lama a sulhnu kan lo hmuh tawh Jason Fuchs chu script ziaktu tur a ni thung.

"A draft manuscript ka chhiar aṭang ringawt pawhin 50's Fleming lehkhabu hnua spy franchise original leh ropui ber a ni dawn tih ka hre nghal," tiin director tur Vaughn chuan a sawi.

Kum 25 mi Dua Lipa hian eng role nge a chan dawn hriat a la ni lo. Album pahnih chauh la tichhuak mah se rimawi khawvel lama chawimawina sang Grammy award hial dawng tawh a ni a, lemchan khawvelah hian eng angin nge sulhnu a hnut chhiah dawn hriat a chakawm tawh hle.

A social media account lamah pawh Lipa hian a film channa tur hi a tarlang tawh a, #ARGYLLE 2022 tih tarlang telin nakkum lama tlangzarh hman ngei an tum niawm tak a ni.