Cassettes EP hmasa ber tur 'Kan EP'

'Engtin nge ni dawn?' tih hla hmanga Zofate min awitu Cassettes chuan hun eng emaw chen thawm an neih loh hnuah vawiinah hian an EP hmasa ber 'Kan EP' chu an tlangzarh dawn.

Cassettes chuan lockdown karah a rem dan danin an EP thar tur hi an buaipui tih an sawi a, nikum December thla aṭang khan recording ṭanin vawiinah hian an EP thar 'Kan EP' chu an rawn chhawp chhuak thei dawn ta a ni.

An band member-te hmun hrang hranga awm darh an nih avangin a huhoa thiltih harsa an ti a, chumi avang chuan an EP tur pawh hi an buaipui rei tih an sawi a, Nocturnal records puihnain an puitlin thei ta tih an sawi bawk.

'Kan EP'-ah hian hla paruk a awm dawn a, an orginal panga- Mizo hla pahnih leh saphla pathum bakah Mizo hla hlui cover pakhat an dah a ni.

"A chhunga hla awmte hi an mahni ṭheuh a zûn nei an ni a, indie leh classical rock lam rawngkai an nih mai bakah ngaithlatute lungdum zawng a nih ngei kan beisei. Kan genre hi ṭawngkam khat maia dah a har bakah, a band member-te music taste hrang hrang khaikhawm aṭanga tun dinhmun lo thleng thei hi kan ni bawk.

"Tuna kan hla rawn chhawp chhuah turte hi, kan hla ziah sa tam zawk aṭanga ṭha ber tura kan ngaih thlan khawmte an ni a, a tirah single anga tihchhuah rilruk a nih laiin, kan sawiho hnuah full EP anga tihchhuah ṭha kan ti tlang ta zawk a ni," tiin an EP thar chungchangah hian Cassettes chuan an sawi.

YouTube lamah dah chhuah hmasak phawt an tum a, music video thar erawh kan hmu rih dawn lo thung. Boruak ziaawm hnua khawih tur hmachhawp erawh an nei nual a nih hmel.

Spotify leh streaming platform dangah pawh ngaihthlak theih tura chhawp chhuah an la tum bawk a ni.

Cassettes chuan lawmthu sawiin, "He EP hlawhtlin theihna atana inhnamhnawih zawng zawng te chungah lawmthu kan sawi a, a bik takin U teênga (Gospel River Band), vortex-Lunglei leh Nocturnal records member zawng zawng te chungah lawmthu sawi sen loh kan ba a ni," an ti.