Bollywood Box Office : Sum lalut hnem ber Tiger Zinda Hai

Bollywood star Salman Khan leh Katrina Kaif-te channa 'Tiger Zinda Hai' chu Indian Box Office-a sum lalut hnem ber a ni a, ni 30 chuang he dinhmun hi a luah tawh.

Tiger Zinda Hai hi nikum December 22 khan tlangzarh a ni a, ni 33 chhungin cheng vaibelchhe 334.88 zet a la lut tawh a ni. Box Office-a kar nga chhung zet a zawna sum lalut hnem ber ni thei hi tunlai Bollywood film zinga ngaihven hlawh ber a ni mek. Tiger Zinda Hai hian sum lakluh tam lamah kum 2015-a tlangzarh Bajrangi Bhaijaan chu a khum ta bawk a ni. Salman Khan leh Kareena Kapoor-te channa Bajrangi Bhaijaan hian vaibelchhe 320 a lalutin rcord a siam a, mahse hei hi Tiger Zinda Hai hian a rawn khum ta a ni.

Katrina Kaif chuan “Tiger Zinda Hai hi kan rin phak bakin mipuiin an hlut a, record duhawm tak hi hriatreng a ni tawh ang" a ti. Salman pawhin, "Hlawhtlinna ropui tak a ni, he filma tha leh zung sengtute zawng zawng thawhrimna rah a ni. Bollywood industry-in hma a sawn zel a, hlawhtlinna pawh a chan chhoh zel ka beisei" tiin, Bollywood hmasawnna a tarlang. Film director Ali Abbas Zafar pawhin an hlawtlinna chan hi ropui a tih thu a lo sawi ve mek bawk.

Tiger Zinda Hai hi khawvel hmun dangah pawh chhuah a ni a, a suam lakluh tawh zawng zawng hi vaibelchhe 550 a tling tawh a ni. Hetih lai hian Bollywood film zinga sum lalut tam ber erawh Baahubali 2: The Conclusion a ni a, Tiger Zinda Hai hi pasarihna a ni. A chungah hian Dangal, PK, Bajrangi Bhaijaan, Sultan leh Dhoom 3 te an awm.