Elton John-a'n Farewell Tour neih zawhah Tour chawlhsawn tawh dawn

English singer Elton John chu Farewell Tour nei turin a inbuatsaih mek a, hemi hnu hi chuan tour a chawlhsan tawh tur thu a puang. Elton John chuan a chhungte tan a hun tam zawk hman a duh tih a sawi.

'Rocket Man' hitmaker Elton John chuan, "Ka chhungte kianga hun tam zawk hman ka duh tawh a ni. Anni hian min thlahleh em em a, keipawhin an kianga awm nuam ka ti" tiin, tour chawlhsan a tum chhan chu a chhungte vang a nih thu a sawi. Elton John chuan music khawvelah hun ropui tak a lo tawng tawh tih sawiin, tour neiin khawvel hmun hrang hrang hrang a fang kual leh dawn tih a sawi. Tour neia zinkual chu nuam ti viau mah se, Farewell Tour neih zawh hi chuan chhungkaw tana hun tam zawk hman a duh tawh tih a sawi. English singer hian Nilaini khan New York City-ah thutharthatute a kawm a, tour chawlhsan a tum chhan chu ama hriselna lam vang a nih loh thu a sawi bawk.

English singer chuan album buaipui zui zel erawh a tum tih a sawi a, music chawlhsan a la tum lo tih a sawi. Elton John chuan, "Music hi ka nuna bet a ni a, a pawimawh em em a ni. Chawlhsan turin ngaihtuahna ka la seng ngai lo a, album buaipui zel ka la duh a ni" tiin, a fan te lawmna tur thu a sawi.

Elton John hian 'Farewell Yellow Brick Road' tour a nei dawn a, hmun hrang hrangh concert ṭum 300 zet a nei dawn. A album hmasa ber 'Goodbye Yellow Brick Road' chu kum 1973 khan a tichhuak a, hemi pual hian a tour tawpna ber tur pawh hi a hming a vuah a ni. Kumin chhungin show vawi 120 vel neih hman a tum a, September thla hian North America aṭangin a ṭan ang. Heti a nih chuan kum thum chhung vel chu tour hian hun a la hmang dawn tihna a ni.

Elton John hi kum 1998 khan music leh charity lama a thawhhlawk avangin Queen Elizabeth II chuan 'Sir' nihna a pe a, British khua leh tui chawimawina pek a nih hnu hian Sir Elton John a lo ni ta a ni.