Samsung aia hralh kal Xiaomi!

India ramah smart­phone brand chi hrang hrang hmuh tur a tam ta sawt viau a, smartphone hmangtute tan pawh Sam­sung, Xiaomi, Lenovo, Oppo, Gionee, Vivo leh company dang tam tak duh thlan tham a awm. South Korean Company lian Samsung chu kum ruk chhung zet smartphone hralh hnem ber an ni a, mahse tun hnaiah Chinese Company Xiaomi Redmi chuan an rawn khum ta a ni.

Research firm Cana­lys chuan zirchianna an neih aṭangin India rama smartphone hralh hnem ber chu Xiaomi a nih thu an sawi. Xiaomi hi nikum October- December thla chhung khan maktaduai 8.2 zet hralh chhuah a ni a, hemi chhung vek hian Samsung chu maktaduai 7.3 hralh a ni. Samsung hian kum ruk chung zet chu a ber nihna an lo hauh tawh a, Chinese Com­pany-te an lo lan tak hnuah an market hian tlakhniam lam an pan tial tial a ni. Mahse heti chung hian smartphone brand dang ten an la khan lo hle thung a, Xiaomi nena an inthlauhna pawh hi a tam lo hle.

Samsung hian kum 2017 chhung khan Indian smartphone market an thunun a, kum tawp lam thla thum chhung Xiaomi-in rawn khum mah se kum tluana an hralh chhuah erawh a la tam ber tho a ni. Samsung leh Xiaomi-te'n thla thum chhunga smartphone an hralh chhuah zat hi India rama mobile phone hralh zat aṭanga chhuta 52% zet a tling phak a ni! Hemi awmzia chu company dang tam tam awm ve bawk mah se, Chinese leh South Korean Company lian pahnihte hian smartphone market an thunun hneh rih hle tihna a ni.

Zir mite chuan Samsung leh Xiaomi-te hi kuminah pawh consumer ngah chho ber turin an ngai. Counterpoint Research chuan Xiaomi hian smartphone market 25% an thunun theih an ring a, Samsung 23%, Lenovo, Vivo leh Oppo-te 6% ṭheuh a nih an ring bawk. Xiaomi CEO Lei Jun chuan India ramah an company-in nasa taka hma an sawn thu a sawi a, an hlutna pawh $tld 100 a tling tawh niin a sawi.