Apple-in 'Business Chat' tlangzarh dawn

Whatsapp-in sumdawnna lama huang zauh nan India leh Brazil-ah Whatsapp Business Application an lo tlangzarh tawh a, Facebook pawhin Facebook Messenger an kalpui mek bawk. Apple chuan hei hi hriain Whatsappa leh Facebook el pha tur hian India ramah 'Business Chat' an tlangzarh dawn tih an sawi.

Apple chuan Business Chat hi customer-te nena awlsam zawka inbiakpawhna tura ruahman nih thu an sawi. Kumin nipui velah hian Beta kaltlangin launch a ni ang a, iOS 11.3 chinah hman theih a ni ang. Apple hian nikuma Worldwide Developer Conference an neih ṭum khan hemi chungchang hi an lo sawichhuak tawh a, tunkar Nilaini khan an tlangzarh tur thu hi an puang ta a ni. Business Chat hi India rama an customer-te'n ṭangkai taka an hman theih an beisei tih an sawi a, hun rei loteah tlangzarh a nih tur thu an tarlang.

Zirchianna aṭanga a lan dan chuan Facebook hmangtu 62% zet chuan Messenger an hmang a, a hmangtu hi an pung chho zel bawk. Kum 2017 chhung khan tluklehdingawn 1.2 velin zetin sumdawnna kaihhnawihah Messenger hi an hmang a, India ramah pawh mi maktaduai 250 velin Messenger hi an hmang bawk. A hmangtu an pun zel avang hian Whatsapp pawhin mihring tamna India-ah tun hnai khan Whatsapp Business Application an tlangzarh a, Apple an lo lang ve leh chiah bawk. Company lianten India ramah mihring an tam tih hriain huang an zauh zel a, hmasawnna kawngah nasa takin an intlansiak mek a ni.