Mystical Mizoram Ṭhazual Gospel : One In Christ 'Kan Pathian Ropui' a ropui ber

Mystical Mizoram Ṭhazual Gospel chart-ah One In Christ 'Kan Pathian Ropui' chu pakhatna a ni a, C. Lalremruata 'Sulam Lenmawi' chu pahnihna niin Lalthlengliani Jongte 'Malsawmna ka Beisei Leh si' chu pathumna a ni.

'Kan Pathian Ropui' a ropui ber
Mizo Gospel group ṭha ber zinga mi One in Christ chuan April thla tir lama an tihchhuah 'Kan Pathian Ropui' hmangin chart-ah ro an rel.

Ṭhazual chart-a mikhual lo tak, vawi tam chart topper lo ni tawh ṭhin OiC hla hi an YouTube channel-ah thliara ngaihthlak turin an dah a, hla thothang ṭha leh ngaihthlak manhla tak a ni.

Music video hmuhnawm tak nena an tihchhuah 'Kan Pathian Ropui' hi Alvin-a lehlin a ni a, nikum lamah khan music video shooting pawh an nei fel vek tawh a, mahse April thlaah khan an tichhuak chauh thung. Chart-ah a inlanna a rei tawh a, hma a sawn chak a, tunah phei chuan chart-ah pakhatna a ni der tawh.

He hla hi a mawiin an sa thiam hle a, chart lehah a dinhmun a la humhim zo dawn em tih chu hriat a chakawm tawh viau mai.

OiC hian an hla pakhat 'Ka Mit Ngei Hian a Thlir Ang' tih chu 10-na an nihpui mek bawk.

Pahnihna leh Pathumna chu
C. Lalremruata 'Sulam Lenmawi' chu palina aṭangin pahnihnaah a rawn inhlangkai a, chart lehah pakhatna a ni zo dawn em tih erawh hriat a chawkawm tawh hle. Music video hmuhnawm tak nena a tihchhuah C. Rochhuma hla phuah 'Sulam Lenmawi' hi Mizote rilrem zawng tak a ni a, pahnihna hial a ni thei pawh hi a mak lo.

Lalthlengliani Jongte pawh Ṭhazual chart top 3-ah a rawn inhlangkai ve leh ta. Thlengi hi chart-ah a che ṭha ṭhin a, tunah hian Malsawmna ka Beisei Leh si' chu pathumna rawn nihpuiin a dinhmun a ṭha sawt hle.

Chart-a lang dangte
Sawmtea Chhangte 'Ṭhangthar Vannei' chu palina a ni a, The Prophets 'Siamtu Pathian' chu pangana a ni bawk.

Anni bakah hian Seraphic Choir, Ruth Malsawmtluangi, Mawipuii, Madini & Nubawihi-te bakah Lallungmuana te pawh che ṭha zual 10 zingah an tel a ni.