Windows 11 Bihchiang ang

Microsoft-in June 24-a Windows 11 chungchang a puanzar hnuah khan helam buaipuitu mi hrang hrangin an ngaihven hle.

Windows 11 OS thar hi Windows 10 hmang mekte tan chuan a thlawnin update-in a hman theih dawn nia tarlan a ni a, i khawlin a zawh tawk tura bituk 'system requirements' a phak phawt chuan sum senga lei a ngai dawn lo.

Tlangzarh hun tur tak erawh puanzar a la ni lo a, mahse Microsoft lamin an tarlan dan chuan kumin kum tawp hma ngei chuan tlangzarh an tum. Techology lam tuipui zual tan chuan tunah hian Windows Insiders-ah 'beta' a awm tawh a ni.

Windows 11 System requirements
Windows 11 hmang tur chuan i processor kha 2 core tal a ni tur a ni a, a clock speed 1GHz aiin a hniam tur a ni lo bawk. 4GB Ram tal i hman a ngai dawn a, storage 64 GB tal a ngai bawk ang.

TPM security version TPM 1.2 emaw a aia sang a ngai a, SecureBootCapable a support tur a ni.

Intel sixth leh seventh-generation processor hmang khawlahte chuan update hi a theih dawn lo a nih hmel a, AMD-based system- A-series leh FX-series-te bakah Ryzen 1000 leh Ryzen 2000 chips-te chu Windows 11-ah hian a hman theih dawn loh niawm tak a ni.

Windows 11 minimum system requirements:-
Processor : 1 GHz emaw a aia chak, 2 core emaw a aia sang 64-bit processor emaw System on a Chip (SoC) hmang thei
RAM : 4 GB
Storage : 64 GB
System firmware : UEFI, Secure Boot capable
TPM : Trusted Platform Module (TPM) version 2.0
Graphics card : DirectX 12 chin WDDM 2.X driver hmang thei
Display : High definition (720p) display 9” diagonal aia sang, 8 bits per color channel

Thil thar eng nge awm dawn?
User Interface thar kan hmu dawn a, Windows Store thar a awm dawn bakah performance lamah hmasawnna a awm bawk ang.

Taskbar leh Start button thar 'centre-aligned' a awm dawn a, Windows 8 aṭanga kan hmuh ṭan 'Live Tiles' ho kha dahbo a ni dawn. Heng bakah hian thil thar hrang hrang a awm dawn a ni.

Android
Microsoft chuan an OS thar turah hian Android apps an dah tel dawn a, Microsoft store-ah Android apps hmuh tur a awm tawh ang. Heng apps-te hi Amazon Appstore kaltlangin a download theih dawn.

Adobe Creative Cloud, Disney+, TikTok, Zoom,-te bakah Microsoft Teams, Visual Studio leh Notepad, Paint tihvel pawh Microsof Store-ah dah a ni dawn tih an puang bawk.

Gaming features
Windows 11 OS hi PC gamer-te tan chuan a phurawm tawh viauin a rinawm.

DirectX 12 Ultimate a support dawn a, hei hi high frame rate-a 'immersive graphic' hman theihna tur a ni.

Auto HDR a support dawn a, chu chu Microsoft chuan visual experience ṭha zawk, colour range zau zawk leh mawi zawk pe chhuak thei tur a ni tih an sawi. DirectStorage a awm dawn bawk a, chu chu CPU kaltlang loa, graphic card kaltlanga direct-a game assets load-na tur a nih avangin game a load chak zawk dawn niin an sawi bawk.