Box Office : F9 record 'Black Widow'-in a khûm nghal

Marvel Cinematic Universe phase 4 film hmasa ber 'Black Widow' chu Zirtawpni liam taah khan North America-ah tlangzarh a ni a, hrilen hnua tlangzarh kara sum lalut tam ber record a siam nghal.

F9 khumtu 'Black Widow'
Kar thum liam taah khan 'F9: The Fast Saga' chuan hrilen hnua tlangzarh kara film sum lalut tam ber record a lo siam tawh a, $maktaduai 70 chuang a lalut. Chu record chu tun kar tawp liam taah khan MCU Phase 4 khuhhawngtu film 'Black Widow' chuan rawn khumin $mtd 80 zet a lalut.

'Black Widow' hi kar tawp liam taah khan theatre 4,160-ah an tichhuak a, $80,366,312 lai sum a lalut a ni. North America pawn lamah $78,000,000 lai lalut bawkin ram hrang hrang Box Office aṭanga a sum lakluh chu $158,366,312 lai a ni tawh.

'Captain America: Civil War' leh 'Avengers: Infinity War' inkara thil thleng anga chan 'Black Widow' hi nikum May thlaa tlangzarh an tum tawh kha a ni a, hrileng boruak kan hria a, film dang ang bawkin tlangzarh hun an sawn ve sek a, Zirtawpni liam ta khan tlangzarh a ni ve ta hram a ni.

He film chungchangah hian Critics lam ngaihdan a inang lo a, chutih rual erawh chuan Scarlett Johansson leh Florence Pugh-te chevel erawh chu an fak hlawm hle thung.

Box Office piah lamah
Box office hero nih mai hi 'Black Widow' tum a ni lo. Theatre lama tlangzarh a nih rual khan Disney+ streaming platform lamah pawh tlangzarh nghal a ni a, heta ṭang hian $mtd 60 chuang sum a lalut tawh.

Iron man kan hmuh loh chhan
'Black Widow' tlangzarh a nih hma khan Robert Downey Jr 'Tony Stark' cameo-in a inlan dawn nia sawi thawm a awm a, mi tam takin an hmuh pawh an inbeisei.

Total Film-in an kawmnaah film director Cate Shortland chuan,"Thil engkim hi sawi khawm a ni ṭhin a, character hrang hrang chungchang pawh. Kan thutlukna chu, Kevin (Marvel chief Kevin Feige) pawhin a sawi chu, Black Widow khan mipa a mamawh lo. Thlawptu a mamawh anga lantir kan duh lo. Amahin dingchang se kan duh a ni," tiin Iron Man inlan loh chhan a sawi.

Taskmaster-in beisei a pha lo em ni?
Trailer-a Taskmaster a lan aṭang khan fan-te chuan eng ang takin nge a inlan dawn an hre chak hle. Film an tlangzarh ta cheng a, an beisei ang erawh an hmu lo a nih hmel.

Social media lamah Taskmaster chu comic book character adaptation la fuh lo ber nia sawi an awm nual a, an beisei ang an hmuh loh thu sawi langtu an tam viau.

Pahnihna te, pathumnate chu...
'F9: The Fast Saga' chu kar hnih chhung roreltu a nih hnuah nek chhuahin a awm ve ta. Sum lalut tam pahnihna erawh a la ni pha tho a, theatre 3,649 aṭangin $11,436,785 lai a la lalut phak a, a sum lakluh tawh zawng zawng chu $542,720,510 lai a ni tawh.

Kar hmasaa pahnihna 'The Boss Baby: Family Business' chu pathumna niin $8,876,235 a lalut ve leh bawk a ni.

Film thar dang
Box Office Mojo chart-ah film 35 tarlan a ni a, chung film zingah chuan 'Black Widow' bakah 'Summertime' (19) leh 'Scales' (27)-te chu film thar an ni.