Mizo film awlsam taka hmehchhuahna tur

Online-a Mizo Movie en theihna 'Bawmrang TV' apps chu vawiin hian a duh apiang tana hman theih turin phochhuah a ni dawn ta. Chawhnu dar 2 vel aṭang chuan he application hi a hman theih tawh dawn a ni.

Bawmrang TV hi bawmrangtv.com aṭangin download theih a ni dawn a, man tlem tê chawiin he apps kaltlang hian Mizo film hrang hrang en theihin a awm ang.

GRACE a en theih nghal dawn
Mizo Kristian movie “GRACE” chu en theih turin Bawmrang TV hian an chhawp chhuak nghal dawn a, hei ringawt pawh hi he apps install-na tur chhan ṭha tak a tling. GRACE film hi cheng 199 in en theih a ni dawn a ni.

YouTube lamah a trailer kan hmu tawh hlawmin a rinawm a, a OST pawh Ṭhazual chart-ahte topper a lo ni zak zak tawh a, he film hi hmaih phal chi a ni lo ang.

GRACE hi kum 2020 kumtir lam a peihfel vek kha ani tawh a, an tichhuak ṭan dawn chauh a, hripui lengin nasa taka kan ram a tihbuai chhunzawm tak avangin mumal takin an tichhuak thei ta lo. En chak an tam a, tunah erawh Bawmrang TV kaltlang hian a en theih dawn ta a ni.

He film-ah hian Zorema Khiangte, Rosangpuii Ralte, Jonathan Lianhna leh Lalduhsaki-te bakah Mizo film lama sulhnu nei ṭha tak takte kan hmu dawn a, film buatsaihtute chuan he film kaltlang hian mi tam tak nun chhan chhuah nise tih chu an ṭawngṭaina a nih thu an sawi.

Bawmrang TV apps-ah chuan
Film hrang hrang awm sa te pawh man tlawm zawk a en theih tur a duan a ni bawk.

Film thar dah zel turin ruahmanna an siam a, Mizo comedy film leh zirtir nei ṭha tak “Dengi I love you” Movie pawh en theih tur a dah chhuah vat an tum a ni.

Movie en chungchanga harsatna nei emaw, a app download dan leh a hman dan thiam lo emawte tan customer care Phone no. 88370 90070 / 87875 23506 ahte hian dar 9 AM – 5 PM inkarah zawh fiah thei a ni anga, in harsatna lo pui tur che u in an lo in hawng reng dawn a ni.

Bawmrang TV hi Playstore-ah dah a la ni lo a, dah thuai tur erawh chuan hma an la mek thung.