Billboard Chart thununtu Camila Cabello

Camila Cabello chuan a hla hit 'Havana' hmangin Billboard Hot 100, Billboard 200 leh Billboard Artist 100-ah a rualin pakhatna a hauh fai vek a, chart a thunun hneh hle.

American-Cuban singer Cabello hian Young Thug nena an sak 'Havana' hi a hlawhtlinpui hle a, kum hnih liam taa English singer Adele-i'n record a lo siam tawh chu a nih rual ta a ni. Adele hian Billboard Hot 100, 200 leh Artist 100-ah a rualin pakhatna hi lo hauh tawh a, Cabello hi hmeichhe zinga hetiang dinhmun rawn luah leh thei hmasa ber a ni ta a ni. Hei mai hi a ni lo a, Streaming Songs chart-ah a vawi khat nan pakhatna ni bawk. Kar liam ta chhung khan Havana hian stream-tu mi maktaduai 44.9 zet a nei a ni.

Hetih lai hian a zaipui American rapper Young Thug chu Billboard Hot 100-a pakhatna a nih ṭum khatna chauh a ni a, mellung a phum ve ta a ni. Young Thug leh Cabello te hian Havana hi August 3, 2017 khan an tichhuak a, youtube-ah pawh viewer 629,769,248 zet an awm tawh a ni.

Record duhawm chu
Billboard Hot 100 leh Bill­board 200-ah a ruala pakhatna dinhmun luah thei hi an la tam lo a, hmeichhe zingah chuan Adele, Beyoncé leh Britney Spears te chauh an ni. Beyoncé hian 2003 khan he dinhmun hi a lo luah tawh a, Britney Spears pawhin 1999 khan record hi a lo siam ve tawh bawk. Record an lo siam tawh a nihrual rual hian, Adele-i'n Billboard chart pathum-ah a ruala pakhatna a lo luah tawh record chu a nih rual chiah bawk.

Kum 20 mi Cabello hian American girl group Fifth Harmony-a a tel laiin hlawhtlinna eng emaw zat a lo chang tawh a, a chhuahsan hnuah pawh a hlawtling zui hle. Fifth Harmony hian Billboard Hot 100 chart-ah pakhatna an lo hauh tawh a, an member hlui Cabello chuan a mimalin he dinhmun hi a luah zui leh a ni. A ni ang bawk hian One Direction member Zayn Malik chuan hetiang dinhmun hi an lo luah ve tawh bawk.