Indiana Jones chhuak leh dawn

Action/Adventure film 'Indiana Jones' en ṭhinte tan thu lawmawm a awm leh ta. American film siamtu lar Steven Spielberg chuan Indiana Jones panga-na tur an buaipui leh mek thu a sawi a, kum 2020-ah tlangzarh a ni ang.

Academy Award-win­ning director Spielberg chuan, "Indiana Jones hi mi tam takin an ngaina tih ka hria a, hmuh leh pawh an chak a ni. Chumi tihlawhtling tur chuan kan bei mek a, dawh thei takin lo nghak rawh u" a ti. Nikum September thla khan 'Indiana Jones V' siam leh tura hmalakna a awm thu hi puan a lo ni tawh a, tunah chuan a tihchhuah hun tur nen an tichiang ta a ni.

Hetih rual hian a changtu ngaite an inlan kim thei tawh dawn lo a, Shia LaBeouf leh Karen Allen te chu inlan tawh lo tura sawi an ni. Thu lawmawm tak erawh American actor Harrison Ford inlan leh tur hi a ni. Indiana Jones thar tur hi nakkum pawh khian tlangzarh a ni mai thei nia sawi a awm bawk.